[271ra] ou il pensoit a avoir gens dont il feust servis et lesquelz en aucune maniere estoient tenus a lui, et par especial moult grant gens d’armes, chevaliers et escuiers lui vindrent du paÿs de Berne1 ; de ceste contree il en ot trop plus que de nulle autre nacion, et tant qu’ilz se trouverent .j. jour a Saint Irain entre .vjm. et .vijm.a lances et .xxxm. Espaignolz, et tous a cheval, lesquelz avoient grant desir de nous porter dommaige.
« Nouvellesb 2 vindrent en Portingal devers le roy et les seigneurs et les citez et bonnes villes qui de l’aliance et de l’accord le roy estoient, et fu nombree la puissance que le roy de Castille menoit ensemble, et fut le roy enfourmez que tout estoit fait pour venir mettre le siege devant Lusebonne, dont pour avoir conseil comment on se cheviroit, le roy et les seigneurs qui avecques lui estoient se mistrent ensemble. Et la fu dit et demonstré au roy par les plus notables de tout son paÿs que de toutes les soubtivetez que on pouoit comprendrec, c’estoit que on alast audevant des ennemis, et qu’on ne se laissast pas enclorre en cité ne en bonne ville qui feust en Portingal, car se on s’i encloioit on seroit tout embesoigniez de garder le cloz, et emdementres eulx ainsi clozd, pourroient les Castelloings a leur aise aler et chevauchier parmi le paÿse et conquerre villes et chasteaulx par force ou par amours, et destruire tout le plat paÿs et nous affamer et tenir ou enclos nous aroient.
« “Et se nous alons audevant d’eulx et preignions place, c’est le meilleur et le plus proufitable, carf bien savons, Sire roy, que vous ne pouez paisiblement joïr de la couronne dont nous vous avons [271rb] couronné, fors par bataille3, et que du moins une foiz ou deux vous aiez rué jus vostre adversaire le roy de Castille et sa puissance. Se nous desconfisons, nous sommes seigneurs. Se nous sommes desconfis, le royaume est a l’[a]ventureg, mais trop miex nous vault requerre que a estre requis, et plus honnourable et prouffitable nous sera, car on a veü par trop de foiz que les requerans ont eu l’avantaige sur les defendans. Si vous conseillons que vous faciez vostre mandement a ceulx dont vous pensez a estre aidiez et servis, et prenez les champsh.”
« Le roy de Portingal respondi :
« “Vous parlez bien, et je le feray ainsi comme vous l’ordonnez.”
Dont fist le roy lettres escrire, et mist clercs en euvre a grant planté, et manda a tous que ilz feussent au Port4 de Portingal ou la pres dedens le jour que il y assigna. Sachiez que tous ceulx qui furent escrips ne mandez ne vindrent pas, car tout le royaume pour ce temps n’estoit pas de sa partie ; aucuns dissimuloient qui vouloient veoir comment les ordonnances se porteroienti, et les aucuns estoient alez en Castille devers le roy, pour ce que ilz disoient que il avoit plus grant droit a la couronne de Portingal que nostre roy n’avoit. Nonobstant tout ce, le roy de Portingal vint a Connimbres et la fist son assembleej de toutes gens d’armes qu’il pot avoir. Au voir dire il ot de Portingal a esleccion toutes les meilleurs gens et les plus auctorisiezk, contes, barons et chevaliers, et ot bien purement .xxvc. lances, chevaliers et escuiers, et .xijm. hommes de pié. Quant ilz furent tous assemblez, on ordonna connestable et mareschal. Le connestable fu le conte de Novare5, et le mareschal messire Alve