265r

[265ra] roy qui est a present avecques eulx, et s’en vindrent tout fendant parmi la ville devers la Monnoie ou la royne Alienor et Jehan Ferrant Andere estoient ; encores se boutoient toutes manieres de gens en leurs routes. Quant ilz furent venuz a l’ostel qu’on dit la Monnoie, on rompi les portes et entra on dedens par force, et vint on en la chambre de la dame qui fu moult effraiee quant elle vit tant de peuple venir yreusement sur lui. Si se getta a genoulx devant [le] maistre [d’Avis] et lui pria a mains jointes que on eust pitié de lui, car elle ne cuidoit avoir riens forfait, et que a la cou­ronne et a l’eritaige de Portingal elle ne demandoit riens, et bien savoient toutes gens, se il leur en vouloit souvenir,^a

« “Mais je vous prie, maistre [d’Avis], et aussi fay je a tout ce peuple, que a ce besoing il vous en souviengne^b que oultre ma volenté le roy Ferrant me mist en la seigneurie et couronne de Portingal, et me prinst et espousa et fist royne de ce paÿs^c.

« – Dame, respondi [le] maistre [d’Avis], ne vous doubtez en riens, car ja de vostre corps vous n’aurez mal, ne nous^d ne sommes point ci venu pour vous porter dommaige du corps, ne contraire, mais y sommes venuz pour ce traïsteur qui la est, Jehan Ferrant Andere, si fault qu’il muyre tout du commencement, et puis le venge le roy de Castille se il puet, car il a esté trop longuement en ce païs son procureur¹.”

« A ce mot s’avancerent ceulx qui ordonnez estoient pour ce faire, si prindrent le chevalier et tantost le mistrent a mort^{e 2}. Il n’y ot plus riens fait pour l’eure, ne homme [265rb] assailli ne mort, ne plus on n’en vouloit avoir, mais retourna chas­cun en son hostel, et le roy ala au sien.

« Aprés^{3 f} la mort de Jehan Ferrant Andere, madame Alienor qui royne avoit esté de Portingal ot conseil et volenté a partir de Luse­bonne, et de soy traire en Castille et aler devers le roy et sa fille, car elle avoit esté tant effraiee de la mort de son chevalier⁴ que elle avoit esté sur le point d’estre morte, si ne vouloit plus demourer en Portingal, car elle n’y pouoit avoir paix ne honneur. Si en fist pour li et en son nom requerre et prier [le] maistre [d’Avis]. Il s’i accorda legierement et dist que il lui plaisoit bien que elle se partisist, et que bien y avoit cause. Si se departi la dame avec tout son arroy de Lusebonne et de Portingal, et chemi­na tant par ses journees qu’elle vint en la cité de Sebille⁵ ou le roy de Castille se tenoit pour le temps, et la royne aussi. Et quant madame Alienor fu venue la, elle trouva presque tous les nobles de Castille la assemblez, car il y avoit grant parlement sur le fait de Portingal, car le roy Jehan de Castille se vouloit conseiller comment il se cheviroit, et disoit que le royaume de Portingal lui estoit venu et escheü par la succession du roy Ferrant, pere de sa femme, et que quant il la prinst a femme et a espouse, il lui accorda, et tout le paÿs aussi. Madame Alienor de Coigne fu receue et recueillie du roy et de sa fille moult doulcement^g, ce fu raison. Adonc fu elle demandee^h et examinee des besoignes de Portingal comment elles se por­toient. Elle en respondi de tout ce que elle en avoit veü et que elle savoit, et que bien estoit

1. Andeiro se voit donc accusé d’avoir soutenu les intérêts castillans, au Portugal.
2. Le 6 décembre 1383.
3. C’est Fogaça, toujours, qui nous parle.
4. La reine Leonor était très probablement devenue la maîtresse de João Fernando Andeiro.
5. Séville, Andalousie.