273v

[273va] chevalier, Jehan Radigos Perriere1, Jehan Jeume de Salves2, Jehan Radigo de Sarsa 3, Jehan Ferrant Raddigo4, cousin du roy, dan Mon­desque Radigo5, Raddigés de Valeronciaulx6, Rey Mendigés de Valconsiaulx7. »

Lors commença le duc de Lencastre a rire, et Laurencien Fougasse lui demanda,

« Monseigneur, pourquoy riez vous ?

– Pourquoy ? dist le duc, Il y a bien cause : je n’oÿ onques mais nommer tant de fors noms ne si estranges comme je vous oy ci nommer8.

– Par ma foy, respondi l’escuier, tous telz sont ilz en nostre paÿs, et encores plus estranges.

– Je vous en croy, dist le duc. Or me dictes, Laurencien, que [devint]b le roy de Castille ; aprés ceste desconfiture fist il nulle recouvrance ? S’en­frema il en nulles de ses bonnes villes, ne le roy de Portingal le suivi il point a l’endemain ?

– Monseigneur, nennil, nous demourasmes celle nuit sur la place ou la bataille avoit esté, et a l’endemain jusques a nonne ou environ, et nous retournasmes au chastel, le soir, que on dit a Lerie9, a deux petites lieues de Juberot, et de la nous retournasmes a Connimbres. Et le roy de Castille s’en vint a Saint Irain et monta la en une barge et se fist nagier .xiiij. lieues oultre, et la entra en un gros vaissel et s’en ala par mer a Sebille ou la royne estoit, et ses gens s’en alerent li un ça et li autre la, ainsi que gens desconfiz ou il ne pouoit avoir nul recouvrier, car ilz avoient trop perdu, ne ce dommaige point ne recouvront de grant temps, se ce n’est par la puissance du roy de France10. Et pour ce que le roy de Portingal et son conseil scet bien que il se pourchace de ce costé, et que ilz ont grans aliances ensemble, sommes nous envoiez en ce paÿs pardevers le roy d’Angleterre et vous. »

Dont respondi [273vb] et dist :

« Laurencien, vous ne vous partirez pasc sans reporter bonnes nouvelles en Portingal, mais je vous pri que un autre rencontre que voz gens orent ou champ de Sebille, si comme je vous ay ouy compter, que vous le me vueilliez dire, car je oy volentiers parler d’armes, quoyque je ne soie pas bon chevalier11.

– Monseigneur, respondi l’escuier, volen­tiers. »

« Aprésd celle belle journee et honnourable que le roy Jehan de Portingal ot a La Cabesse de Juberot, et qu’il fu retournez a grant triumphe en la cité de Lusebonne, et que on n’oioit nulles nouvelles que Chastellain ne François se rassem­blassent en Castille, mais se tenoient en garnis­ons, se parti le roy de Castille de Sebille et sa femme et tout son oste et s’en ala a Burges12, et advint que les nostres et les leur guerrioient par garnisons, dont une foiz chevauchoit le conn­estable de Portingal, le conte de Novaire, et s’en vint entrer en Castille et ou champ de Sebille, et n’avoit en sa compaignie environ que .xl. lances, et s’en vint courir devant une ville que on dit Val­verde13 ou il y avoit de Castelloings bien .cc. combatans et tous gens d’armes. Le conte de Novaire s’en vint frappantf devant la barriere de la ville et faisant sa monstre, et monstroit bien que il demandoit la bataille a ceulx de dedensg, lesquelz se tenoient tous quoys et ne faisoient nul compte par semblant de issir, mais ilz s’armoient et appa­reilloient. Quant noz gens orent esté devant la ville de Valverde une espace de temps, et tant que bon leur fu, ilz s’en partirent tout chevauchant le pas, et se mistrent

  1. João Rodrigues Pereira.
  2. João Gomes da Silva.
  3. João Rodrigues de Sá, chambellan du roi de Portugal.
  4. João Fernandes Rodrigues ?
  5. Mem Rodrigues de Vasconcelos, nommé Maître de Saint Jacques par le roi de Portugal.
  6. Rodrigues de Vasconcelos (le même que le précédent, pourtant ?).
  7. Rui Mendes de Vasconcelos.
  8. Référence aux consonances étranges, pour un anglo­phone, de tous ces noms portugais prononcés devant le duc de Lancaster par un lusophone de la cour portugaise.
  9. Leiria.
  10. Charles VI.
  11. Lancaster se fait ici la caution du chroniqueur, par le biais de Fogaça.
  12. Burgos.
  13. Valverde de Leganés, près de Badajoz (Estrémadure, Espagne).