[268va] [d’Avis] et lui avoient juré foy et hommage, si fu plus pensif que devant, car il ne cuidoit pas que les choses deussent ainsi aler et que les Portingalois se deussent avancier sitost de le couronner a roy pour la cause de ce que il avoit avecques lui grant foison de nobles du royaume de Portingal. Si dist :
« “Je voy bien que il me couvendra, de fait et de force, de conquerir ce qui est mien, se je le vueil ravoir. Jamais n’aura paix entre Castille et Portingal, jusques a ce que Portingalois aient amendé ce que ilz ont fait.”
« Aprés ce que le roy de Portingal fut couronnez, il s’en vint a Lusebonne et la se tint, et entendi grandement a mettre a point les besoignes de son royaume pour acquerir la grace et amour de son peuple. Et departi ses chevaliers et gens d’armes et les envoya en garnison parmi ses villes et ses chasteaulx sur les frontieres du royaume d’Espaigne, car le roy1 se tenoit a Sebille. Si fu envoiez du roy de Portingal en garnison en Trentouse2 messire Jehan Ferrant Percek3, un moult appert et vaillant chevalier et de haulte emprinse, avecques lui messire Martin Vas de Coigne4, et son frere messire Guillaume Vas de Coignea 5, deux moult appers chevaliers, et avoient dessoubz eulx .cc. lances de bonnes gens et tous bien montez. D’autre part fu envoiez au chastel de l’Evre6 vers Juberot messire Jehan Radigos Perriere7 atout cinquante lances ; en la cité de Valence en Portingal fu envoiez depar le roy messire Jehan Genines de Salves8, a l’encontre de la forte ville de Tuye qui siet pres de la, la quele s’estoit tournee et rendue au roy de Castille quant il vint devant Lusebonne. Et en Tuye avoit de François et de Castelloings grant garnison de gens d’armes. En la cité de Serpe fu envoié messire Mondech Radigo9, un moult appert [268vb] chevalier, atout cinquante lances. Au Port ne [a] Evreb 10 ne a Connimbres n’en mist on nulles gens d’armes, car le roy sentoit les hommes des villes dessusdictes bons et loyaulx envers lui, et fors assez. Ainsi que je vous di, Monseigneur, en l’an que le roy fu couronnez, furent pourveues ces garnisons de bonnes gens d’armes. Si vous di que souvent y avoit des rencontres, des escarmouches et des assaulxc les uns sur les autres ; une foiz gaignoient noz gens, autre foiz perdoient, ainsi que l’aventure d’armes advientd, mais par especial il y ot un rencontre de ceulx de la garnison de Trencouse sur les Castelloings moult fort et moult bel.
– Haa ! Laurencien, dist le duc de Lencastre, ne vous en passez point briefment que je ne sache et oye comment il en advint, et par quelle maniere ilz se trouverent sur les champs, car je oy d’armes parler moult volentiers.
– Monseigneur, respondi l’escuier, c’est l’entencion de moy que je le vous die, et l’ordonnance du fait si comme il en ala, car a ce rencontre je fu present, et portay ce jour la baniere de messire Jehan Ferrant Percek par qui la besoigne commença, car il estoit pour lorse capitaine de Trencouse.
« Vousf devez savoir, Monseigneur, que le roy de Castille sur les frontieres et bendes de Portingal avoit pourveu de gens d’armes ses garnisons, le quelg a la foiz pour nous contrarier et porter dommaige se rengeoienth ensemble et mettoient sur les champs. Une foys perdoient et l’autre ilz gaignoient, ainsi que les choses se portent en armes. Or advint une foys que jusques a .vij. capitaines d’Espaignolz, tous haulx