[262ra] du roy Ferrant de Portingal et des Portingallois, car ilz avoienta logiez aux champs .xv. jours tous entiers devant les Castelloings, et point ne les avoient le roy Ferrant ne son conseil voulu combatre. Si leur avoit bien dit et monstré le conte leur defaulte et leur avoit dit :
« J’ay en ma compaignie de purs Angloiz environ .vc. lances et mil archiers. Sachiez, sire roy, et vous barons de Portingal, que nous sommes tous conjoins ensemble de bonne volenté pour combatre noz ennemis et d’attendre l’aventure telle que Dieu la nous vouldra envoier. »
Mais le roy Ferrant, que il ne ses gens n’avoient point conseil de combatreb, pourquoy quant le conte vit ce, il se parti et emmena Jehan son filz1 hors du royaume de Portingal. Et quant il fut retournez en Angleterre, cil roy de Portingal s’accorda au roy Jehan de Castille et maria sa fille a lui par paix faisant. Et ce traittié fist messire Jehan Ferrant Andere, un chevalier de Portingal, car le roy Ferrant n’avoit conseil ne fiance fors en li. Si lui demanda bien le roy a sa fille le quel elle avoit plus chier pour son mari. Elle avoit respondu que elle amoit miex Jehan d’Angleterre2 que Jehan de Castille. Le pere lui avoit demandé pourquoy elle avoit ce dit ; [si respondi] pour tant que Jehan estoit beaux enfes et de son aage, [et] afin que elle n’eust le roy de Castille ; et bien l’avoit dit au roy Ferrant son pere, mais le roy pour paix avoir aux Espaignolz, pour tant que ilz y marchissent de tous costezc, l’avoit la mariee. Et a ce mariage faire et au desmarier son filz avoit rendu grant paine un chevalier de Portingal du quel le [262rb] conte [s]e tenoit malcontentd, qui s’appelloit messire Jehan Ferrant Andere. Encore avoit dit le conte au duc de Lencastre son frere que le roy Ferrant mort, il se doubtoit que les communaultez du paÿs de Portingal ne se rebellassent contre celle dame Bietrix, car le plus du paÿse, combien que le roy eust espousé sa mere, madame Alienor de Coingnef, ne la tenoient pas a legitimeg mais a bastard[e]h. Et en murmuroient ja li Portingalois, lui estant ou paÿs ; pour celle cause s’estoit il prins pres de ramener son filzi. Le duc de Lencastre au quel les choses touchoient trop plus grandement de l’eritaige de Castille, car il avoit a femme l’ainsnee heritiere de Castille, que elles ne feissent au conte de Cantebruge, car ja avoit il une belle fille de sa femme madame Constance3, si se vouloit bien justement enfourmer de ces besoignes et ne les vouloit pas mettre en nonchaloir, mais eslever et exaulcier du plus que il pouoit, car il veoit bien si clerement sur son affaire que il ne pouoit avoir au jour d’adont nulle plus belle ne plus propice entreej ou royaume de Castille que par le royaume de Portingal. Et veoit que il en estoit priez et requis grandement, et especiaulment du roy de Portingal et des barons et communaultez du dit royaumek, et quant ce roy Jehan de Portingal on le tenoit a sage et vaillant homme, et ja avoit desconfit par bataille le roy de Castille atout grant puissance4, dont il estoit plus honnourez, si s’enclinoit trop grandement le duc a aler en Portingal, et aussi le roy d’Angleterre et son conseil li avoient accordé. Mais pour li justement enfourmer de toutes ces besoignes, de l’estat et condicion du païs, du droit de la dame madame Bietrix