pb 76 rmonde deust finer. Et n’y avoit si hardy ne si oultrageux de l’une part ne de l’autre qui ne voulsist estre a terre. Car ces barges et ces navies hurtoient les unes aux autres tellement qu’il sembloit qu’elles deussent ouvrir et fendre. Si demanderent conseil les seigneurs d’Engleterre a leurs mariniers quelle chose leur estoit bonne a faire. Ilz respondirent que d’eulx traire a terre le plus tost qu’ilz pourroient. Car la fortune estoit si grande en mer que se le vent les y boutoit, ilz seroient en peril d’estre tous noyéz. Lors entendirent ilz generalment a traire les ancres amont, et mistrent les sigles aussi comme demy quartier. Et tantost esloingnierent la place. D’autre part les Espaignols et Genevois se desancrerent. Et prindrent le parfont car ilz avoient plus grans vaisseaux et plus fors que les Englois n’avoient, si pouoient mieulx attendre le hustin et la fortune de la mer, et aussi se leurs gros vaisseaux eussent froté a terre, ilz eussent esté en peril d’estre rompuz. Pour tant se bouterent avant ou parfont. A leur departement trouverent IIII nefs englesces chargees de pourveances, qui s’estoient tenus ensuz de la bataille. Lesquelx IIII nefs ilz atachierent a leurs nefs et les emmenerent aprés eulx. Et sachiés que le vent et la fortune qui estoit si grande, qu’il les bouta avant qu’il feust jour plus de cent lieues ensuz du lieu ou ilz s’estoient combatuz. Et les nefs monseigneur Robert d’Artois prindrent terre a un petit port asséz pres de la cité de Vennes, dont ilz furent tous resjoiz quant ilz se trouverent a terre.

Ainsi et par ceste grant fortune se desrompy Gap: sampling pb 76 v