pb 18 vpour les grosses pierres qui dedens estoient. Et quant ilz furent passéz, chascun s’ala logier selon celle riviere ainsi qu’il peut prendre terre. Mais ainçois qu’ilz eussent pris piece de terre pour logier, le souleil commença a esconser. Et si y avoit petit de ceulx qui eussent haches ne coingnees ne ferremens ne instrumens pour logier, ne pour couper boys et s’en y avoit plusieurs qui avoient perduz leurs compaignons, et meismement les gens de pié estoient demourréz derriere et si ne savoient a qui demander leur chemin. Et disoient ceulx qui le mieux cuidoient le paÿs congnoistre qu’ilz avoient cheminé cellui jour XXVIII lieues englesches, toudiz courant sans arrester fors que pour pissier ou pour son cheval recengler. Celle nuit les couvint gesir sur celle riviere tous arméz, chascun tenant son cheval en sa main par le frain. Car ilz ne le savoient a quoy lier. Ainsi ne mengierent les chevaulx toute la nuit, ne le jour devant, d’avoine nulle ne de fourage. Et les gens meismes ne gousterent tout le jour ne la nuit que chascun son pain qu’il avoit troussé derriere lui, qui estoit de la sueur du cheval tout souillié. Ne ilz ne beurent d’autre buvrage que de la riviere qui la couroit, fors aucuns seigneurs qui avoient bouteilles, et n’eurent ne feu ne lumiere. Car ilz ne le savoient de quoy faire fors aucuns seigneurs qui eurent tortiz aportéz sur leurs sommiers. En tel meschief passerent ilz la nuit sans oster les selles a leurs chevaux ne eulx desarmer. Et quant le desiré jour fu venu qu’ilz esperoient a trouver adrece pour eulx et leurs chevaulx aisier ou pour combatre aux Escos qu’ilz desiroient moult pour eulx delivrer de celle povreté, il commença a plouvoir et toute la journee tant que la riviere sur laquelle ilz estoient logiés, de nuit fu si grande avant l’eure de nonne que nul ne la peust passer, par quoy nul ne peut envoier pour veoir en queil lieu ilz estoient cheuz, ne ou ilz pourroient recouvrer de fourage ne littiere pour leurs chevaux, ne pain ne vin pour eulx soustenir, si les couvint jeuner ainsi comme la nuit, et les chevaux aussi fors fueilles d’arbres. Et couperent plançons de bois a leurs espees et badelaires pour leurs chevaux lier. Et verges pour faire logettes a eulz mucier. Entour nonne aucuns povres du paÿs furent trouvéz. Lesquelx distrent au Englois qu’il avoit d’ilec XIIII lieues jusques a Nuefchastel sur Thin, et XI lieues jusques a Cardoel en Galles, et si n’avoit nulle ville plus pres de la ou on peust rien trouver pour eulx aisier. Quant ce fu noncié au roy et aux seigneurs, chascun envoia tantost ses messages celle part, et ses petiz chevaux et ses sommiers pour apporter pourveances. Et fist on savoir depar le roy a la ville de Nuefchastel sur Thin que, qui voudroit gaingnier, si amenast pain et vin et autres denrees, et on lui paieroit sans delay. Et le feroit on conduire a saufconduit dedens a l’ost. Et leur fist on savoir que on ne se partiroit de la endroit jusques a tant que l’en saroit que les Escos estoient devenuz. SHF 1-32 sync A l’endemain entour heure de nonne revindrent les messages que les seigneurs et autres compaignons avoient envoiés aux pourveances et en raporterent ce qu’ilz peurent pour eulx et leurs mesgnies. Mais ce ne fu mie grandement et avec eulz vindrent gens pour gaingnier qui amenoient sur mulés et petiz pb 19 r