roy d’Angleterre y avoit
envoyé. On nommoit le chevalier messire Guillaume Fil Raoul.
¶ A celle heure que l’estourmie monta et le hairois, il estoit en son hostel et se
commenchoit a descouchier. Si entendy les nouvelles qu’i leur ville estoit prise: "Et desquelx gens?", demanda il. "De
Bretons", respondirent
ceulx qui parlerent a luy. "Ha !", dist il, "
Bretons sont male gent.
Ilz pilleront la ville et l’ardiront et puis s’en partiront." "Et quel cry cryerent ilz?", demanda le chevalier. "En nom Dieu, sire, ilz crierent La Trimoulle." Adont fist le chevalier clorre et fremer
son hostel, et se arma et touttes ses gens se armerent aussy, et se tindrent la dedens pour
veoir se point de reschousse il n’y avoit; mais nennil, car tous estoient si esbahi’s qu’ilz
fuyoient, les ungs cha et l’autre la, les povres gens au moustier, et les aulcuns vuidoient la ville par une aultre porte et guerpissoient tout.
¶ Ces
Franchois bouterent le feu en la ville, pour plus encoires
esbahir les gens, en pluseurs lieux; mais il y avoit grans hostelz de pierre et de bricque, se n’y
se pouoit le feu atechier ne prendre legierement. Nequedent la greingneur partie de la ville fut arse, et fut si nettement pillié que riens de bon n’y demoura tant que ilz le peussent
trouver, et eurent des plus riches hommes a prisonniers. Et fut pris le chevalier anglois en bon convenant;
car, quant il vey que tout aloit mal, il fist son hostel ouvrir,
car il se doubta du feu, pour tant que de premier il veoit grans fumieres en la ville, et
se mist devant son hostel, son pennon devant luy, et ses gens, archiers et aultres, et la se
deffendirent vaillaument et bien; mais en la fin il fut pris et se rendy prisonnier a messire
Guillaume de La Trimoulle, et touttes ses gens furent pris; petit en y ot de mors.
¶ Quant les
Franchois eurent fait leur voulenté de la
ville de Straule en
Guerles, et leurs varlés eurent mis a voye tout leur pillaige, ilz s’en departirent, car ilz
n’eurent pas conseil de le tenir, ilz eussent fait folie, et se misrent au retour devers leurs
garnisons dont ilz en estoient partis. Ainsi en ala de ceste aventure, et avoit le duc de
Guerles ceste premiere buffe et ce premier dommaige,
dont’il fut moult courrouchiéz, quant il sceut les nouvelles. Il estoit pour ces jours a
Nyemaie, mais il vint la tantost a tout grant gens d’armes et cuida
moult la bien trouver les
Franchois. Si fist raemperer le lieu et le repourveir
d’autres gens d’armes, qui furent depuis plus diligent de garder la ville qu’ilz
n’eussent esté en devant.
¶ Ainsi avient il des aventures d’armes; les ungs perdent une foiz et une aultre foiz le
regaingnent.
pb 258 r