afection de trouver leurs ennemis, et demanderent aux fuyans qui
afuyoient a sauveté a Trentouse ou leurs ennemis estoient et ou ilz les
trouveroient. Ilz respondirent que ilz n’estoient pas loing et que ilz ne chevauchoient que le pas,
car ilz ne pouvoient tost aler pour la grante proie que ilz menoient. De ces nouvelles fu le dit Jehan Ferrant Percok tout resjoy et dist a ses compaignons, a messire Martin
Vas de Nogiéz et a Guillaume Vas de Coigne son frere: "Avançons nous. Je
ne vueil jamais rentrer en ville ne en chastel qui soit en
Portingal si aray veü nos
ennemis et combatu a eulz et me metteray en paine de rescoure la proie", et puis me dist: "Laurentien, desvelopéz ma baniere, car il est heure; nous trouverons tantost
les ennemis." Lors fis je ce que il me commanda et chevauchames les bons
galos, et veismes devant nous les pourrieres de nos ennemis. Lors presimes nous l’avantaige du
soleil et chevauchasmes sus hele et venimes a eulx. Quant les Catheloings nous
perceurent, si se tinrent tout quoy, et se remirent ensamble, et ordonnerent leur proie et leurs
prisonniers tout d’un léz; nous les approchames de si pres que bien poiemes parler
a eulx et eulx a nous, et veimes trois banieres et quatre
pennons, et estoient par advis en flotte bien III
C et tous bien montéz. Les
banieres je vous nommeray: tout premier Jehan Radigho de Gastegnas, chevalier et baron en
Castille, messire Alvo Gresie d’Albenés et messire Adyoutale de Thoulete; les pennons, messire Pierre Seuase de Toulete, messire Adyoutale de Casele, messire Jehan Uadigo de Vere, et Dyo Ssanses de Thors.
Quant nous fumes l’un devant l’autre, nous mesimes pié a terre, et aussi firent eulx, et furent
chevaulx bailliéz aux pages et aux varléz; et avant que nous assamblissions de lances, de dardes
ne d’armes a eulx ne eulx a nous, nous eusmes grant parlement, voire les cappitaines de l’une part
et de l’autre, car je, qui present y fus, oy toutes les paroles, pour tant que
mon maistre
messire Jehan Ferrant Percok, de qui je portoie la baniere, estoit au devant d’eulx, et a luy
estoient adrechiéz le parlement. Tout premier il demanda a eulx qui leur faisoit chevauchier en
Portingal ne lever proie. Messire Adyoutale de Thoulete respondi ainsi
et dist que ilz y pouoient bien chevauchier ainsi comme ilz voloient pour
pb 96 r