endementres que vos gens sont en chault sang." "Est
ce vos paroles?" dist le roy a ceulx de son paÿs. Monseigneur
Daghomés
Mendruich, messire Digho Persement, Pierre Goussart de Mondesque et Pierre Ferrant de Valesque, et le grant maistre de Caletrave
respondirent a la parole du roy et a sa demande, et distrent: "Monseigneur, nous avons bien
entendu ces chevaliers de France, et
veons et oons que ilz vous conseillent a aler chaudement combatre vos ennemis. Nous volons bien
que ilz sachent, et vous aussi, que avant que nous soions jusques a la et entréz en eulx, il sera tart,
car vous veéz le soleil comment il se tourne, et si n’avons encores ordonné noz batailles. Si est
bon que nous attendons le matin, et les approchons de si pres que nous sachons par nos espies et
par nos chevaucheurs, que nous esparderons sur les champs en pluseurs lieux, leur convenant. Se
il a vient ainsi que sur le point de la minuit ilz se deslogassent et se voulsissent retraire, nous nous
deslogerons aussi. Ilz ne nous pevent fuir ne eschapper. Ilz sont en plain paÿs; il n’y a place ne lieu
fort, excepté le lieu ou ilz sont, de cy a
Luscebonne, que nous ne les puissons
avoir a nostre aise, et ce conseil nous vous donnons." Adont se teut le roy ung
petit et abaissa la teste et puis
regarda dessus les estrangiers. Et lors parla
messire Regnault Lymosin, lequel estoit, si comme vous savéz, mareschal de toute
l’ost, et dist, pour complaire aux
François, en langaige espaignol, afin que
il fust mieulx oÿs et entendus, car bien le savoit parler tant avoit il longuement esté nourry entre
eulx, et tourna sa parole sur les
Espaignolz qui d’en costé le roy
estoient et qui ce conseil donné avoient: "Vous seigneurs, si les nomma tous autour par noms
et par surnoms, car bien les congnoissoit, comment poéz vous estre plus saiges de bataille ne
mieulx uséz d’armes que ces vaillans chevaliers qui cy en present sont? Comment poéz vous
deviser sur eulx chose qui soit de nulle value, car ilz ne firent oncques en leurs vies autre chose
fors que traveillier de royaume en royaume pour trou
ver et avoir les armes?
Comment poéz vous ne oséz riens deviser sur leur parole ne desdire leur advis qui est si hault et
si noble que pour garder l’onneur du roy et de son royaume, ouquel vous avéz
plus grant part que ilz n’ont, car vous y avéz vos heritaiges et vos corps, et ilz n’y ont que leurs
corps, lesquelz tout premierement ilz veullent aventurer, et ja ont ilz requis
pb 53 r