pb 192 r
mer, en Engletiere, et tenoit sus la mer entre C et IIIIXX gros vaissaulx tous arméz,
pourveux de gens d’armez et d’archiers, et avoient balenghiers, qui couroient sus lez
bendez des illez de Normendie, pour savoir dez nouvellez. Nous noz soufferons I petit
a parler dou duc de Bourbon et dou siege de Taillebourc, ou il fu plus de IX sepmaines.
Et recorderons comment ly amiraulx de France et ly armee de mer françoise prisent
terre en Escoce, et quel samblant de belle requelloite on leur fist ou païs.
SHF 2-440 sync Li armee de France qui s’en aloient en Escoce, avoient vent a vollenté. Car il
estoit ly mois de may que lez aigez sont en leur douceur, et s’est ly airs sieris
et quois, si costiierent de commenchement Flandrez, et puis Zellandez et Hollandez et
Frise, et exploitierent tant que aprochierent Escoce et que il le veirent.
Mais, anchois qu’il y peuissent parvenir, il mesavint par grant infortuneté a I
bon et jone chevalier de France, appert homme d’armez, qui s’appelloit messires Aubiers
de Hangiers, ly chevaliers estoit jonez et de grant volenté, et pour monstrer apertisse
de corps, tous arméz il se mist a monter amont et a ramper contre le cable de
la nef ou il estoit, en chela faissant, ly piéz ly fally, il fu reverséz en la mer,
et la perilz, ne onquez on ne le pot aidier. Car tantos il fu effondréz pour lez
armeurez dont il estoit vestis, et ossi la nef fu tantos eslongie, a ce n’avoit
nulle remede, de la mort de la mesaventure dou chevalier furent tout li baron et
ly chevalier courouchié, mais passer leur convint. Car amender ne le porent. De
puis singlerent il tant que il ariverent et prissent terre en Haindebourc,
la souveraine ville d’Escoce, et la ou li rois se tient le plus, quant il est ou païs,
ly contes de Douglas et li contez de Mouret, qui lez atendoient et qui estoient
tout avisé et enfourmé de leur venue, se tenoient en la ville de Haindebourc,
sitos que il seurent que li armee de France estoit venue, il vinrent contre
eux sus le havene, et lez requellierent moult doucement, et leur dissent que a bien
fuissent il venu et arivé ou païs. Et recongneurent cil baron d’Escoce, tout
premiers, messire Joffroy de Carni. Car il avoit esté la saison pasee en Escoce et
bien II mois en leur compaignie. Messires Joffrois, car bien le sot faire, lez aquinta
de l’amiral et dez barons de France, pour ce tamps ly rois d’Escoce n’estoit point
encorez venus en Haindebourc, mais se tenoit en la Sauvage Escoce, ou par usage
il se tient plus volentiers que ailleurs, mais il avoit la III ou IIII de ses
filz qui rechurent cez signeurs moult doucement et leur dissent que ly rois
venroit temprement, de cez parolle il se contenterent, et se logierent li signeur
et leurs gens en Haindebourc au mieux qu’il peurent, et qui ne pooit estre
logiéz en la ville, il logoit as villagez environ. Car Haindebourc, comment que
ly roys d’Escoce y tiengne son siege et que ce soit Paris en Escoce, n’est pas pb 192 v