pb 68 v
che cop navréz a mort, che poés vous bien croire. Ly escuiers engléz passa oultre
et mist sa lance jus qui estoit brissie, et s’en revint viers sa caiiere, li escuiers
françois qui se sentoit ferus a mort s’en alla jusquez a sa caiiere et la s’asist,
ly signeur de son cop, qui avoient veut le cop et qui li veoient porter le tronçon
ou hateriel, vinrent celle part, on li osta tantos le bacinet et li osta on le tronçon
et le fier. Si tretos comme il l’eut hors dou col, il tourna d’autre part sans riens dire,
et cei la et morut, ne onquez li escuiers engléz qui venoit la le cours pour ly
aidier, car il savoit parollez qui faissoient estanchier, n’i peut venir a tamps
que il ne le trouvast mort. Lors n’eut en Nicollas Cliffort que courouchier,
quant il vei que par telle mesavenue il avoit mort I vaillant homme et bon
homme d’armez. Qui veist la le conte de la Marce, qui amoit l’escuier mort
suz toutes riens, courouchier et dementer et regreter, il en peuist et deuist
avoir grant pité. Ly connestablez de Franche, qui estoit la presentement, le
reconfortoit et dissoit: "En tels ahatiez ne doit on atendre autre cose. Il est
mesavenu a vostre escuier, mais ly Engléz ne le peut amender." Adont dist
il as chevaliers d’Engletiere: "Alons, alons disner. Il est heure." Ly connestablez, enssy
que maugré eulx, lez enmena ou castiel pour disner avoecquez ly. Car
il n’i voloient aller, tant estoient il courouchiet de la mort de celly. Ly contez
de la Marce ploroit moult tenrement et regretoit son escuier. Nicollas Cliffort
s’en vint a son hostel et ne voloit nullement aler ou castiel disner, tant
pour le grant courous que il avoit pour le mort de celly que pour les
amis et proimez de l’escuier, mais li connestablez l’envoiia querre, et le convint
venir ou quastel. Et, quant il fu devant li, il ly dist: "Certez, Nicollas,
je croy asséz, et bien le voy, que vous estez courouchiéz de la mort Jehan
Bouchinel, mais je vous en escuse. Vous ne l’avéz peut amender, et, se
Dieux me vaille, se je euisse esté ou party ou vous estiéz, vous n’en avéz
fait cosse que je n’euisse fait. Car mieulx vault grever son ennemy
que ce que on soit grevé de li, tellez sont les parechons d’armez." Adont
s’asist on a table, si disnerent li signeur tout par loissir. Apriéz disner et
le vin pris, ly connestablez appella monsigneur le Barrois dez Barez et ly dist:
"Barrois, ordonnéz vous. Je voel que vous conduissiéz ces Engléz jusquez
a Chierebourc et faitez partout ouvrir villez et chastiaulx et eulx ame
nistrer che qui leur besongne." Ly Barrois respondi et dist: "Monsigneur, volentiers."
Adont prissent li Engléz congiet au connestable de Franche et as chevaliers
qui la estoient. Si vinrent a leurs hostelz, tout estoit tourset et apparilliet. pb 69 r