pb 114 v
quant il sceut que de burez, de lais et de froumagez qui aloient a Gand de la conté d’A
los et des villez voisinez, dont il estoient rafresqui, si y mist remede. Car il manda
a ceux de la garnisson de Tenremonde que cils plas païs fust tous ars et exilliéz, ce fu fait
a son commandement, et convint adont lez povrez gens, qui vivoient de leurs bestez tout
parperdre et enfuir en Braibant et en Haynnau, et la grigneur partie mendiier, encorez
demora uns païs pour ceulx de Gand, qui s’appelle les IIII Mestiers. Car on n’y pooit
avenir, et toute la douceur que il avoient leur venoit de ce costé. Tout cel yvier,
ly contez de Flandrez avoit si astrains ceulx de Gaind que nulz blés ne leur ven
oient ne par terre ne par aigue. Car il avoit tant exploitié envers ses cousins,
le duc de Braibant et le duc Aubert, que leur païs estoient clos a l’encontre de
ceulx de Gaind, ne riens ne leur venoit, fors en larechin et en grant peril pour
ceulx qui s’aventuroient de mener vivrez. Dont il estoient en Gand moult esbahit.
Et dissoient li sage que ce ne pooit longuement demorer que il ne fuissent
tout mort par famine. Car li grenier estoient ja tout vuit ne on n’y trouvoit
nulz blez, et ne pooient trop de peuple avoir point de pain pour leur argent.
Et, quant li fournier avoient quit, il convenoit garder leurs maissons a force
de gens, autrement li menus peuplez, qui moroient de faim, eussent efforciet les lieus.
Et estoit grans pitéz dou veoir et oir les povres gens, et proprement hommez,
femmez et enffans bien notablez ceoient en ce dangier, et tous lez jours en venoient
lez plaintez, li plour et li cry a Phelippe d’Artevelle, qui estoit leurs souverains capi
tains, ly quelz en avoit grant pité et grant compacion, et y mist pluiseurs bonnes
ordonnancez, dont il fu moult agraciiés. Car il fist ouvrir les greniers des
abbeyez et des ricez hommez et departir le bled parmy un certain pris d’argent
et fuer que il y fist mettre. Che reconforta et mena moult avant le ville de
Gand. A le fois leur venoient en larechin de Hollandez et de Zellandez vivres en
tonniaux, farinez et pains quis, qui moult les reconfortoient. Et eussent esté
trop plus tos desconfit que il ne fuissent, se chela n’euist esté et li reconfors
des païs dessus dis. Il estoit deffendu en Braibant depar le duc que sus la
teste on ne leur menast riens, mais, se il le venoient querre a leur peril, on
leur pooit bien vendre ou donner, dont il avint ens ou Quaresme que
il furent en Gand a trop grant destroit. Car des vivrez de Quaresme n’a
voient il nulz. Si s’en partirent en une compaignie bien XII mille sau
doiiers et gens qui n’avoient de quoy vivre et qui estoient ja tout taint
et velu de famine, et s’en vinrent devers la bonne ville de Brouxellez, on leur
cloy les portez au devant. Car on se doubta d’eus, ne on ne savoit a quoy il
pensoient. Quant il se trouverent en la marce de Brouxellez, il envoiierent pb 115 r