pb 20 vet les chevaulz tous enselléz. Et les couvenoit tousjours par nuit guettier par connestablies les champs et les chemins d’entour la ville, et envoier aucunes escoutes de mie lieue loing pour escouter se ces gens vendroient, ainsi que informéz estoient. Et que on leur rapportoit et leur disoient chascun jour gens creables, chevaliers et escuiers qui bien le cuidoient savoir. Par quoy, se ces escoutes ouyssent gens esmouvoir pour venir devers la ville, ilz se devoient retraire vers ceulx qui gardoient les champs, pour eulx maintenir et advisier, afin qu’ilz feussent plus tost montéz et appareilliéz, et venir ensemble, chascun a sa baniere, en une place qui pour ce estoit advisee et ordonnee.

En celle tribulacion demourerent en ce faubourc par l’espace de IIII sepmaines, que tous les jours on leur rapportoit telles nouvelles ou pires asséz, et telle foiz un jour que l’autre. Et en vindrent plusieurs apparances qui durement les esbahissoient. Car a dire voir ilz n’estoient que une poingnee de gens au regart de la communaulté du royaume d’Angleterre qui la estoit ensemble. Ne ilz n’osoient esloingnier leurs hostelz ne leurs armeures ne entrer en la cité, excepté les seigneurs qui aloient veoir le roy et la royne et leur conseil pour festier, et pour apprendre des nouvelles et combien longuement on les tendroit en celle angoisse. Et se le meschief de la mesadventure et le peril n’eust esté, si sejournoient ilz asséz bien aiséz. Car la cité et le païs d’entour eulx estoit si plantureux que, en plus de six sepmaines que le roy et tous les seigneurs d’Angleterre et tous les estrangiers et leurs gens, dont il y avoit plus de LXM hommes, sejournerent la, n’en rencherirent vivres que on n’eust denree pour un denier, aussi comme on avoit paravant, et qu’ilz ne vendissent bons vins de Gascoingne, d’Ausoie et de Rim a tresbon marchié, poulailles et toutes manieres d’autres vivres aussi. Et leur amenoit on devant leurs hostelz le foing, l’avoyne et la litiere, dont ilz estoient bien servis.

Quant ilz orent la sejourné par l’espace de IIIIsepmaines aprés la bataille, on leur fist assavoir depar le roy et les mareschaulx que chascun se pourveist dedens celle autre sepmaine, de charretes et de tentes pour gesir aux champs, et tous autres hostilz neccessaires pour aler devers Escoce, car le roy ne pouoit plus la sejourner. Adonc se pourvey chascun selon son estat au mieulx qu’il pot.

¶ Quant on fut appareilliéz, le roy et tout ses barons se trairent hors et alerent logier a six lieues loing de la ditte cité. Et messire Jehan pb 21 r