pb 111 vbleciéz d’une part et d’autre.

¶ Finablement les Anglois, qui estoient en leur navie, s’i exploitterent tellement qu’ilz rompirent un grant pan de pallis.

¶ Quant ceulx de Bergerach virent le meschief, ilz se retrairent arriere et requirent a avoir respit tant qu’ilz feussent conseilliéz pour eulx rendre. Il leur fut accordé le parfait et le demourant du jour et de la nuit ensuivant jusques a soleil levant, sauf tant qu’ilz ne se devoient de riens fortifier. Ainsi se traïst chascun en son logeis; celle nuit furent a grant conseil les barons de Gascoingne, assavoir comment ilz se maintendroient. Eulx bien conseilliéz, ilz firent enseller leurs chevaulx et chargierent leur avoir et monterent a cheval et se partirent environ mienuit, et chevauchierent vers la ville de la Riolle, qui n’est mie loings de la, ou on leur ouvry les portes. Si entrerent ens et se logierent et hebergerent parmy la ville.

¶ Or vous dirons de ceulx de Bergerach comment ilz finerent.

Quant ce vint au matin, les Anglois, qui estoient tous confortéz d’antrer en la ville de Bergerach, feust bellement ou autrement, entrerent de rechief en leur navie et vindrent tout nagent a cel endroit ou ilz avoient rompus les pallis. Si trouverent illecques grant foyson de ceulx de la ville qui estoient tous advisiéz d’eulx rendre, et prierent aux chevalliers qu’ils les voulsissent prendre a mercy, sauves leurs vies et leurs biens, et de cy en avant ilz se mettroient en l’obeissance du roy d’Angleterre.

¶ Le conte de Pennebroch et le conte de Stanfort²⁹ respondirent qu’ilz en parleroient voulentiers. Et puis demanderent ou le conte de Laille et les barons estoient. Ilz respondirent: "Certainnement nous ne savons, car ilz chargierent et trousserent des menuit tout le leur et se partirent, mais ilz ne distrent point quelle part ilz aloient." Sur ces parolles se partirent les deux contes dessus nomméz et vindrent au conte d’Erby, qui n’estoit mie loing de la, et lui monstrerent tout ce que les gens de Bergerach venoient faire. Le conte d’Erby, qui fut moult noble et tres gentil cuer, respondi: "Qui mercy prie, mercy doit avoir. Dittes leurs qu’ilz ouvrent leurs portes et nous laissent entrer ens: nous les asseurons de nous et des nostres." Adont retournerent les deux chevalliers dessus diz et recorderent a ceulx de Bergerach tout ce que vous avéz ouy, dont ilz furent tous joyeulx.

¶ Quant ilz virent qu’ilz pourroient venir a paix. Si vindrent en la place et sonnerent les cloches, et s’asemblerent tous, hommes et femmes, et firent les portes ouvrir, et vindrent a grant procession et moult humblement contre le conte d’Erby et ses gens, et le menerent en la grant eglise, et lui jurerent feaulté et hommaige, et le recongneurent a seigneur ou nom du roy d’Angleterre par vertu d’une procuration qu’il portoit. Ainsi ot en ce temps le conte d’Erby la bonne ville de Bergerach, qui se tint depuis angleche.

¶ Or nous revendrons aux seigneurs de Gascoingne, qui pb 112 r