pb 17 rterent che qu’il peurent, yauls et leurs mesnies : granment ne fu ce mies. Et avoeques che qu’il peuent vinrent gens pour gaagnier, qui amenoient sour petis chevaus et petis mullés pain mal quit en paniers, povre vin en grans baris et aultres denrees a vendre, dont moult de gens et grant partie del host furent durement apaisiet; et ensi de jour en jour, tant qu’il sejournerent la entours VIII jours sour celle riviere, entre ces montagnes en attendant tous les jours le sourvenue des Escos, qui ossi ne savoient que li Englés estoient devenu, non plus que li Englés savoient d’iaus. Ensi furent il III jours et III nuis sans pain, sans vin, sans candeille, sans avaine et sans fourage ne aultres pourveanches; et apriés, par l’espasse de IIII jours qu’il leur convenoit accater I pain mal quit VI estrelins, qui ne deuist valoir c’un paresis, et I gallon de vin XXIIII estrelins, qui n’en deuist valoir que VI. Encore y avoit on si grant rage de famine que li uns le tolloit hors des mains de l’autre, dont pluiseur hustin et grant debat vinrent des compaignons, des uns as aultres. Encore avoec tous ches meschiés, il ne cessa point de plouvoir toute celle semaine, par quoi leurs seelles, peniaulz, contrechaingles furent tout poury. Et tout li cheval ou li plus grant partie quassés sus les dos et ne savoient de quoy chiaus ferrer qui estoient desferret, ne de coy couvrir, fors que de leurs tourniquiaus d’armes. Et ossi n’avoient li plus grant partie que vestir, ne de quoy couvrir pour le plueve, ne pour le froit, fors que de lors auketons et de leurs armeures. Et n’avoient de quoy faire feu, fors que de verde lengne, qui ne puet durer encontre le plueve.

A tel meschief, mesaise et povreté demorerent il entre ces montagnes et le ditte riviere toute celle semaine sans oir nouvelles des Escos qui cuidoient qu’il deuissent par la ou assés pres rapasser pour retourner en lor païs. De quoy grant murmuration commencha entre les Englés. Car aucun voloient en mettre as aultres qui avoient donné ce conseil de la venir en tel point, que il l’avoient fait pour le roy traïr et toutes ses gens : si que pour çou fu ordonné entre les signeurs que on se mouveroit de la et rapasseroit on la ditte riviere VII lieues par deseure, la ou elle estoit plus aisielle a passer. Et fist on crier que cascuns s’apparillast, pour deslogier l’endemain, et sieuist les banieres. Et si fist on adont crier que, qui se vorroit tant travillier qu’il peuist raporter certaines nouvelles au roy la ou on poroit trouver les Escos, li premiers qui che li raporteroit, il aroit C livrés de terre a hiretage a l’estrelin, et le feroit li rois chevalier. Quant ces nouvelles furent esparses par l’ost, toutes gens en orent grant joie. Adont se departirent de l’host aucun chevalier et escuier engléz pb 17 v