pb 95 rd’Allemagne, si comme il est deviset ou conmenchement de ce livre. SHF 1-240 sync Assés tols appriés traita li rois Phlippe de France et fist trettier par le conte de Blois enviers monsigneur Jehan de Hainnau que il vosist estre franchois et il li transporteroit la revenue qu’il avoit en Engleterre, en France et ly assigneroit sy souffissamment comme il plairoit a son consel. Li dis messires Jehans de Hainnau a ce tretié ne s’acorda miez legierement car il avoit le fleur de se joneche usé ou serviche le roy d’Engleterre, et se l’avoit toudis li rois moult amés. Quant li contes Loeis de Blois, qui avoit sa fille pour moullier et avoit III fils, Loÿs, Jehan et Guy, vei et considera qu’il n’y poroit entrer par celle voie, s’y trouva moiien le signeur de Fagnuellez, qui estoit compains au dit monsigneur Jehan de Haainau et li plus grans de son consel. Sy fu avisé pour retraire le dessus dit de l’oppinion des Englés, on li fist entendant ung grant temps que on ne li voloit paiier sa revenue en Engleterre. De che se merancolia messires Jehan de Hainnau telement qu’il renoncha as fiéz, as convenanches et as seelés qu’il avoit au roy d’Engleterre et tantost que li rois de France le sceut, il envoia deviers lui souffissans hommes et le retint a lui et a son consel a certains gages et le recompensa en son roiaulme de tant de revenue et plus qu’il tenist en Engleterre. Ensy demora messires Jehan de Hainnau, sires de Biaumont, Franchois tout son vivant et le trouverons en avant en ceste histore ens es armees et chevauchiez que li rois de Franche fist, loist a sçavoir li rois Phlippe et li rois Jehans, sez filz. Or retourrons nous a le matere dez guerres de Gascongne et de Languedok.
SHF 1-241 syncBien estoit informés li rois Phlippez des chevauchies et des conqués que ly contes d’Erbi avoit fait ou dessus nommet païs de Gascongne et comment il avoit pris villes, chités et chastiaus, et le païs durement foulé et apovri. Si en estoit moult courouchiés et avoit fait uns tres grant et tresespecial mandement que tout noble et non noble dont on se pooit aidier au fait de bataille, fuissent en le chité d’Orliiens et de Bourges, ou la environ dedens certains jours qui y furent mis car il voloit le duch de Normendie son ainsné fil envoier ens es marches de Gascongne pour resister contre le poissance des Englés. Sy s’esmurent au mandement dou roy grant fuison de dus, de contes, de barons et de chevaliers dou roiaulme et par especial de Bourgongne et de Normendie. Et vint a Paris li dus Oedes de Bourgongne, oncles germains dou duch de Normendie,34 et messires Phlippe de Bourgongne, ses fils, conte d’Artois et de Boulongne. Si se representerent au roy et en son serviche a M lanches. Ly rois lez rechupt et leur sceut grant gret de ce service. Sy fisent chil doy signeur passer leur gens oultre. Appriés vinrent li dus de Bourbon, messires Jakeme de Bourbon, conte de Ponthieu, sez freres, ossy a grant fuison de gens d’armez. Sy revint li conte d’Eu et de Ghinez, connestables de France, en tres grant arroi, ossy li conte de Tankarville, ly dauffins d’Auvergne, ly conte de Forés, ly conte de Dammartin, li conte de Vendome, li sires de Couchy, li sires de Craan, li sirez de Sulli, ly evesquez de Biauvais, ly sire de Fiennes, li sires de Biaugeu, messires Jehan de Chalon, li sires de Roie et tant de barons et de chevaliers que je ne lez aroie jaméz tous nommés. Sy se assamblerent pb 95 v