pb 87 rde Halle, "ce ne sera ja que ensy nous nos doions rendre pour estre tout mort ceens." Adont passerent li chevalier franchois oultre et revinrent a leur logeis. Et li troy chevalier englés demorerent dedens Auberoche tout esbahi, au voir dire car ces pieres d’engien leur busquoient sy grans horions que ce sambloit effondres qui descendesist dou chiel, quant elles frappoient contre lez murs dou chastiel.

Toutes lez parollez et lez devises et le convenant dou messagier, conment il avoit esté pris devant Auberoce et l’estat de la lettre et le neccessité de chiaus de dedens furent sceues et raportees et a Bourdiaus au conte d’Erbi et a monsigneur Gautier de Manni par une leur espie qu’il avoient envoiiet en l’ost et qui leur dist: "Bien certes, my signeur, a ce que j’ay peüt entendre, se vo chevalier ne sont conforté dedens trois jours, il seront ou mort ou pris et volentiers se renderoient, se on lez voloit prendre a merchy, mes il me samble que nennil." De ces nouvelles ne furent miez li contes d’Erbi et messires Gautier de Manni bien joiant et disent entre iauls: "Che seroit lasqueté et vilonnie se nous lessions perdre trois sy bons chevaliers que chil sont, qui sy franchement se sont tenu dedens Auberoche. Nous irons ceste part et nous esmouverons tout premierement, et manderons au conte de Pennebruc, qui se tient a Bregerach, qu’il soit dalés nous a telle heure et ossy a monsigneur Richart de Stanfort, et a monsigneur Estievene de Tombi, qui se tient a Liebrone." Adont li conte d’Erby se hasta durement et envoia ses messages et ses lettres deviers le conte de Pennebrucq et se parti de Bourdiaus a ce qu’il avoit de gens, et chevauça tout couvertement deviers Auberoce, bien avoit qui le menoit et qui congnissoit le païs. Si vint ly conte d’Erbi a Liebrone et la sejourna I jour, attendant le conte de Pennebrucq, et point ne vint. Quant il vei que point ne venroit, sy fu tous courouchiés et se mist au voie pour le grant desir qu’il avoit de conforter ses chevaliers qui en Auberoche se tenoient car bien sçavoit qu’il en avoient grant mestier. Sy issirent de Liebrone li contes d’Erbi, ly contes de Kenfort,²⁹ messires Gautier de Manni, messires Richart de Stanfort, messires Huez de Hastinges, messires Estievenes de Tombi, ly sires de Ferrieres et ly aultre compagnon et chevaucierent une nuit toute nuit, et vinrent a l’endemain a deus petittes lieuwes d’Auberoche. Si se bouterent en I bois et descendirent de leurs chevaus et les aloiierent as arbres et as fuelles et lez leissierent pasturer en l’erbe toudis attendans le conte de Pennebrucq. Et furent la toute le matinee et jusquez a nonne. Si s’esmervelloient trop durement de ce qu’il n’ooient nulle nouvelle dou dit conte. Quant che vint sus l’eure de remontiere et il veirent que point ne venoit li conte, sy disent entre iauls: "Que ferons nous? Irons nous assallir nos ennemis ou nous retourrons?" La furent en grant imagination quel cose il en feroient car ils ne se veoient miez gens pour combattre une telle hoost qu’il y avoit devant Auberoche car il n’estoient non plus de CCC lanches et de VIC archiers et li Franchois pooient estre entre X M et XI M hommes. A envis ossy le laissoient car bien sçavoient, se il se partoient sans lever le siege, il perdroient le chastiel d’Auberoce et les chevaliers leurs compagnons qui estoient dedens. Finablement, tout consideret et peset le bien contre le mal, il s’accorderent a ce que ou nom de Dieu et de saint Jorge il iroient combattre leurs ennemis. pb 87 v