pb 16 rPopringhe et puis Ippre. Et tout chil de le castellerie de Berghes et chil de Brughes ensieuwant. Et recheurent le conte Loeis leur signeur adont amiablement et paisieulement. Et li jurerent foit et loiaultet a tenir a toudis mais.
Quant li rois Phelippes de France eut remis le conte de Flandres en sen paÿs et que tout li eurent juret feaulté et hommage, il depparti ses gens et retourna chescuns en sen lieu et ils meismement s’en vint en Franche et sejourner a Paris, ou la environ. Si fu durement prisiés et honnourés de telle emprise qu’il avoit fait seür les Flamens et dou serviche ossi au conte Loeis sen cousin. Si demora en grant prospitet et en grant honneur. Et acrut grandement l’estat royal. Et n’i avoit oncques mais eut en France, si comme on disoit, roi qui euist tenut l’estat parel au roy Phelippe. Et faisoit faire tournois, joustes, fiestes et esbatemens moult souvent et a grant plentet. Or nous tairons nous I pau de li et parlerons d’aulqunnes des ordenanches d’Engleterre. Et dou gouvrenement le roi. SHF 1-43 sync Li jovenes rois englés se gouvrena I grant tamps, si comme vous avés oy chi deseure recorder, par le consel de madame se mere, dou conte Ammon de Kent, sen oncle, et de monsigneur Rogier, signeur de Mortemer. Au darrain envye commencha a naistre entre le conte de Kent dessus dit et le signeur de Mortemer. Et monta puis li envye si hault que li sires de Mortemer enfourma et enhorta tant le jovene roy par le consentement de madame se mere le roine. Et li firent entendant que li contes de Kent le voloit empuisonner et le feroit morir temprement s’il ne s’en gardoit pour avoir sen roiaulme comme li plus prochains apriés lui par succession. Car li jovenes freres le roi que on clamoit messire Jehans d’Eltem, estoit nouvellement trespassés. Li jovenes rois, qui creoit legierement che dont on l’enfourmoit, ensi comme jovene signeur, tels a on souvent veüs, croient legierement chou dont chil qui les doiient consillier les enfourment et plus tost en mal qu’en bien fist assés tos apriés che son dit oncle le conte de Kent prendre et le fist decoler publiquement qu’onques il n’en peut venir a escusanche, de quoi tout chil dou paÿs, grans et petis, nobles et non nobles, furent durement tourblet et courouchiet. Et eurent puissedi durement contre cuer le signeur de Mortemer et bien pensoient que par sen consel et pourcach et par fausse amise avoit ensi estet menés et traictiés li gentils contes de Kent, cui il tenoiient tout pour preudomme et pour loial. Ne oncques apriés che li sires de Mortemer ne fu tant amés comme il avoit estet en devant. Ne demora mie depuis granment de tamps que grans fames issi hors seür la mere dou roy d’Engleterre, ne sçay mie se voirs estoit, que elle estoit enchainte, et encouppoit on plus de che fait le signeur de Mortemer que nul aultre. Si commencha durement chils escandles a montepliier tant que li jovenes rois en fu enfourmés souffissanment. Et avech tout che il fu enfourmés que par fausse amise et par envye dou signeur de Mortemer faite plus par traison que par raison, il avoit fait mettre a mort sen oncle le conte de Kent que tout chil dou paÿs tenoiient et avoient toudis tenu pour preudomme et pour loiauls. Dont se li jovenes rois fu tristes et courouchiés, che ne fait pas a demander. Si fist tantos prendre le dit signeur de Mortemer et le fist amener a Londres pardevant grant plentet des barons et des nobles de sen roiaulme et fist conter par I sien chevalier tous les fais le signeur de Mortemer. Ensi comme escrire et registrer les avoit fais. Et quant il furent tout dit et comptet, li dis rois d’Engleterre demanda a tous par maniere de consel et de jugement quel cose en estoit boin a faire. Li jugemens en fu assés tos rendus. Car cascuns en estoit ja par fame et renommee et par juste information tous avisés et informés. Si en respondirent au roy et dirent que il devoit morir en tel maniere comme messires Hues li Despensiers avoit fait et estet justichiés. A che jugement n’eut nulle dilation ne de merchit. Si fu tantos trainés parmi la chitet de Londres seür I bahut. Et puis loiiés seür une eskielle enmi le plache. Et puis li vis coppés a toutes les coulles et jettés en I feu qui la estoit. Et puis li fu li ventres ouviers et li cuers sackiet et traict hors pour chou que il en avoit fait et penset le traison et jettés ou dit feu. Et ensi toute se coraille. Et puis fu esquartelés et envoiiés par quatre maistres chités en Engleterre. pb 16 v