pb 14 vCar leur usage est tel en guerre et leur sobrieté que ilz se passent asséz bien longuement de char cuitte a moittié sans pain. Et si n’ont que faire de chaudieres ne de chauderons, car ilz cuisent bien leur chairs en cuirs de bestes mesmes, quant ilz les ont escorchees. Et si scevent bien que ilz trouverront bestes a grant foison ou païs la ou ilz veullent aler, pourquoy ilz n’emportent autres pourveances, fors que chascun en porte entre la selle et le penneau une grande platte pierre et trousse derriere lui une besaces plaine de farine, en tel entente que quant ilz ont bien mengié de char mal cuite que leur estomac leur semble a estre wit et affoibli, ilz gettent celle pierre ou feu et destrampent ung pou de leur farine de eaue. Et quant leur pierre est eschauffee, ilz gettent de celle clere paste sur celle chaude pierre et en font ung petit tourtel en maniere d’une oublie de beguigne, et le menguent pour conforter leur estomac. Pourquoy ce n’est point de merveille s’ilz font plus grans journees que les autres gens quant tous sont a cheval, horsmis la ribaudaille. Et si ne meinnent point de charroy ne autres pourveances fors, ce que vous avéz oy.

¶ En tel point estoient ilz entréz en cellui païs dessus dit. Si le gastoient et ardoient, et trouvoient tant de bestes qu’ilz n’en sçavoient que faire. Et avoient bien IIM armeures de fer, chevaliers et escuiers montéz sur bons courciers et bons roncincs, et XXM hommes arméz, a leur guise appers et hardiz, montéz sur ces petites haguenees qui ne sont ne liees ne estrillees mais les envoie l’en tantost paistre que on est descenduz en préz, en terre et bruieres. Et si avoient deux bons cappittaines. Car le roy Robert d’Escoce qui estoit moult preux estoit adont durement vieulx et chargié de la grosse maladie. Si leur avoit donné a cappitaine ung moult gentil prince et vaillant en armes, c’est assavoir le conte de Moret, qui portoit en armes ung escu d’argent a trois oreilles d’or de gueulles, et messire Guillaume Douglas, que on tenoit pour le plus hardy et entreprenant de tout le païs, et portoit ung escu d’azur a ung chief d’argent et trois estoilles de gueulles en l’argent. Et estoient ces deux seigneurs les plus haulx barons et les plus puissans de tout le royaume d’Escoce et les plus renomméz en beaux faiz d’armes et en grans prouesces. Or vueil je retourner a nostre matiere.

Quant le roy anglois et tout son ost orent veues les fumees des Escocs, si comme dit est devant, ilz sceurent bien que c’estoient les Escocs qui entréz estoient en leur païs. Si firent tantost crier a l’arme et commander que chascun se deslogast et suivist les bannieres. Ainsi fut il fait et se trairent arméz sur les champs comme pour tant combatre. La endroit furent ordonnees trois grosses batailles a pié et chascune bataille avoit deux esles de VC armeures qui devoient demourer a cheval. Et sachiéz que on disoit qu’il y avoit bien VIIIM armeures de fer, chevalliers et escuiers et XXXM hommes arméz, la moittié montéz sur petites haguenees et l’autre moittié sergens a pié envoiéz par election des bonnes villes a leurs gaiges, chascune bonne ville pour sa route. Et si avoient bien XXIIIM archiers a pié, sans la ribaudaille.

¶ Tout ainsi que les batailles furent ordonnees, on chevaucha tout pb 15 r