pb 13 vet de jour, et ne trouveroient personne depar le roy ne des barons qui leur osast aidier ne secourir. Dont se ilz estoient en grant mesaise et en grant hideur, quant ilz oyrent ces nouvelles, ce ne fait pas a demander. Ne ilz ne sçavoient quelque chose penser ne adviser qu’ilz peussent faire selon ces nouvelles, ne ilz n’avoient esperance de retourner jamaiz en leur païs, ne de veoir ne parler a nulz de leurs amis. Ne ilz n’osoient esloingnier le roy ne les haulx barons, et si ne pouoient sentir nul confort pour eulx aidier l’un l’autre. Si firent les chevaliers de Haynault et leur conseil pluseurs bonnes ordonnances par grant advis, pour eulx mieulx garder et deffendre, par lesquelles il couvenoit tousjours gesir par nuit arméz et par jour en leurs hostelz, et les barons avoir appareilliéz et les chevaulz tous enselléz. Et les couvenoit tousjours par nuit guetier par connestables les champs et les chemins d’entour la ville, et envoier aucunes escoutes d’une lieue loing pour escouter se ces gens vendroient, ainsi que enforméz estoient. Et que on leur rapportoit et leur disoient chascun jour gens creables, chevaliers et escuiers qui bien le cuidoient savoir. Par quoy, se ces escoutes ouyssent gens esmouvoir pour venir devers la ville, ilz se devoient retraire vers ceulx qui gardoient les champs, pour eulx maintenir et aviser, afin qu’ilz feussent plus tost montéz et appareilliéz, et venir ensemble, chascun a sa baniere, en une place qui pour ce estoit advisee et ordonee.

En celle tribulation demourerent ilz en ce faubourc par l’espace de quatre sepmaines, que tous les jours on leur rapportoit telles nouvelles ou pires asséz, et tele fois ung jour que l’autre. Et en vindrent pluseurs apparances qui durement les esbahissoient. Car a dire voir ilz n’estoient que une poingnee de gens au regart de la communaulté du royaume d’Angleterre qui la estoit ensemble. Ne ilz n’osoient esloingnier leurs hostelz ne leurs armeures ne entrer en la cité, excepté les seigneurs qui aloient veoir le roy et la royne et leur conseil pour festier, et pour apprendre des nouvelles et combien longuement on les tendroit en telle angoisse. Et se le meschief de la mesaventure n’eust esté et le peril, si sejournoient ilz asséz. Car la cité et le païs d’entour eulx estoit si plantureux que, en plus de six sepmainnes que le roy et tous les seigneurs d’Angleterre et tous les estrangiers et leurs gens, dont il y avoit plus de XLM hommes, sejournerent la, n’en rencherirent vivres que on n’eust denree pour ung denier, aussi bien que on avoit paravant, et qu’ilz ne vendissent bons vins de Gascoingne, d’Ausoie et de Rim a tresbon marchié, poulailles et toutes manieres d’autres vivres aussi. Et leur amenoit on devant leurs hostelz le foing, l’avoine et la littiere dont ilz estoient bien serviz.

Quant ilz eurent la sejourné par l’espace de quatre sepmainnes aprés la bataille, on leur fist assavoir depar le roy et les mareschaulx que chascun se pourveist dedens celle autre sepmainne, de charrettes et de tentes pour gesir aux champs, et tous pb 14 r