pb 11 vpasser oultre, pour le desir qu’ilz avoient de venir a temps et a point a ce
tournoy qui devoit estre a Condet. Et emmena avecques lui quinze jeunes et preux chevaliers d’Angleterre pour estre a ce
tournaoy avecques lui et par
eulx acointer des seigneurs et des chevaliers qui la devoient estre. Si leur fist toute
l’onneur et compaignie qu’il pot. Et tournoierent deuz fois celle
saison a Condet, puis qu’ilz furent venus.
¶ Or me vueil taire de messire Jehan de Haynault jusques a tant que point sera et revendray au jeune roy Edouart d’Angleterre.
SHF 1-22 syncAprés ce que messire Jehan de Haynault se fut parti du jeune roy et de madame sa mere la royne iceulx gouvernerent le païs par le conseil du conte de Kain, oncle du dit roy, et par le conseil de messire Rogier de Mortemer, qui tenoit terre grant en Angleterre bien VII M livrés de revenue, ung estrelin pour ung denier. Et avoient tous deux esté bannis et enchaciéz d’Angleterre avecques la royne, si comme vous avéz ouy. Et userent aussi par le conseil de messire Thomas de Wage et par le conseil de pluseurs autres que l’on tenoit les plus saiges du royaulme comment que aulcuns aultres en eussent envie. Car on dit que oncques envie ne fust morte en Angleterre. Aussi regne elle et voit on regner en pluseurs autres païs. Ainsi passa l’iver et Karesme jusques a Pasques et furent le roy, madame sa mere et tout le païs en paix ce terme. Advint que le roy Robert d’Escoce, qui avoit esté preux et qui moult avoit souffert contre les Anglois et moult avoit de fois esté dechacié et desconfiz ou temps du bon roy Edouart, tayon a ce jeune roy Edouart, estoit devenu moult vielz et malade de la grant maladie, ce disoit on. Quand il sçot les aventures d’Angleterre, comme le roy avoit esté prins et desposé de sa couronne, et son conseil justicié et mis a destruction si comme vous avéz ouy, il se pourpensa que il deffieroit ce jeune roy d’Angleterre. Car pour tant qu’il estoit jeune et que les barons du royaume n’estoient mie bien d’accort, si comme il cuidoit et que on lui avoit fait entendant par aventure depar aucuns des envieux et du lignage des Despensier, il pourroit bien faire sa besoingne et conquerre partie d’Angleterre. Ainsi qu’il le pensa il le fist. Et environs Pasques, l’an mil CCC XXVII il fist deffier le jeune roy d’Angeleterre et tout le paÿs, et leur manda qu’il entreroit dedens le païs et gasteroit et arderoit aussi avant qu’il avoit fait du temps passé, ou temps que la desconfiture du chastel d’Estrumelin, ou les Anglois receurent si grant dommage.
SHF 1-23 sync Comment le roy Edouart fist sa semonce a tous ceulx de son païs et especialment a messire Jehan de Haynault pour aler contre les Escocs, et comment le dit messire Jehan y vint.Quant le jeune roy Edouart se sentit aussi deffiéz et son
conseil aussi, ilz le firent assavoir par tout le royaume et commander
que tous nobles et non nobles feussent appareilliéz chascun selon son
estat, et venist chascun atout son pouoir au jour de l’Ascention aprés
ensuivant a EvruichVerwich, une bonne cité qui siet ou North. Et envoya devant grant foison de
gens d’armes pour garder les frontieres pardevers Escoce. Et puis
envoia grans messagiers pardevers messire Jehan de Haynault, en le
priant moult affectueusement qu’il lui pleust secourir pb 12 r