pb 95 r (vol. 1)dommage, tant que les bourgois en furent durement ennuyéz, et voulentiers se feussent accordéz a rendre la cité, s’ilz osassent, mais messire Guillaume de Quadudal ne s’i vouloit nullement accorder.

¶ Quant les bourgois et le commun de la cité ourent asséz souffert, et qu’ilz ne veoient nul secours de nulle part, ilz se vouldrent rendre de fait, mais le dit messire Guillaume ne s’i voult accorder.

¶ Au derrain ilz le pristrent et mistrent en prison et puis orent conseil et en convent a messire Charles de Blois qu’ilz se rendroient l’andemain par telle condicion que tous ceulx de la partie de la ditte contesse s’en pouoient aler sauvement, quelle part que ilz vouloient. Dont messire Charles de Blois leur accorda. Ainsi fut la cité de Rennes rendue a monseigneur Charles de Blois l’an de Grace mil CCC XLII a l’entree de may. Et messire Guillaume de Quadudal ne voult point demourer de l’accord messire Charles de Blois. Ains s’en ala tantost pardevers Hainbont, la ou la contesse estoit, qui moult fut dolente quant elle sçot que Rennes estoit rendue; et si n’ooit nulles nouvelles de messire Almaurry de Cliçon ne de sa compaignie.

Quant la cité de Rennes fut rendue ainsi que vous avéz ouy, et les bourgois orent fait feaulté et hommaige a monseigneur Charles de Blois, il ot conseil quelle part il pourroit traire atout son ost pour mieulx avant aler et exploittier de conquerre le demourant. Si se tourna le conseil a ce qu’il se traïst pardevers Hambont, la ou la contesse estoit. Car, puis que le sire estoit en prison, s’il pouoit prendre la ville, le chastel et la contesse, il aroit tantost sa guerre fenie. Ainsi fut fait, et se traïrent vers Hambont tous et assiegerent la ville et le chastel tout autour, tant qu’ilz porent, par terre. La contesse estoit si bien pourveue de bons chevaliers et d’autres souffisans gens d’armes qu’il convenoit pour deffendre la ville et le chastel, et tousjours estoit en souspeçon du secours d’Angleterre qu’elle attendoit, et si n’en ooit nulles nouvelles. Ains avoit doubte que grant meschief ne leur feust advenu, ou par fortune de la mer, ou par encontre d’ennemis.

¶ Avecques lui estoit en Hambont l’evesque de Leon en Bretaigne, dont messire Hervi de Leon estoit oncle, qui estoit de la partie messire Charles de Blois. Et si y estoit messire Yves de Treniguindy, le sire de Landreniau, le chastellain de Guingamp, messire Henry et messire Olivier de Pennefort et plusieurs autres. Quant la contesse et ces chevaliers entendirent que les seigneurs de France venoient assiegier et qu’ilz estoient asséz pres de la, ilz firent commander que on sonnast la bancloche et que chascun s’armast et alast a sa deffense, ainsi qu’il estoit ordonné. Et ainsi fut il fait sans contredist.

¶ Quant messire Charles de Blois et les pb 95 v (vol. 1)