pb 9 vtous les princes et de tous les nobles et non nobles du paÿs. Et la furent donnéz grans joyaulx et tres riches a tous les compaignons qui demouréz estoient deléz luy. Et depuis demoura il et ses compaignons en grans festes et en grans soulas des seigneurs et dames qui la estoient jusques au jour des Trois Roys, que il ouÿ dire que le roy de Behaygne, le conte de Haynault, son frere, et grant planté de seigneurs de France s’ordonnoient pour estre a Condet sur Escaut a ung tournoy qui la estoit crié.
¶ Adoncques ne voult messire Jehan de Haynault plus demourer pour priere que on luy sceust faire pour le grant desir qu’il avoit de venir a ce tournoy et de veoir son gentil frere le conte et les aultres seigneurs qui la devoient estre et especial le plus noble et le plus gentil en largesse roy qui regnast en ce temps, le gentil roy Charles de Behaigne. Quant le jeune roy Edouart, madame la royne, sa mere, et les barons qui la estoient, virent qu’il ne vouloit plus demourer, ne que priere n’y pouoit valoir, ilz luy donnerent congié moult envis. Si luy donna le jeune roy Edouart par le conseil de madame sa mere IIIIC mars d’estrelins, ung estrelin pour ung denier, de rente heritablement a tenir de luy en fief et a paier chascun an en la ville de Bruges. Et donna encores a Philippe du Chasteau, son maistre escuier et son souverain conseillier, cent mars d’estrelins de rente et ainsi a paier comme dit est, et luy fist avec ce delivrer grant somme d’estrelins pour paier les frais de luy et de toute sa compaignie pour revenir en leur paÿs. Et les fist conduire a grant compaignie de chevaliers jusques a Douvres et luy fist appareillier et delivrer tout son passaige. Et les dammes, meismes la contesse de Games, qui estoit suer au conte de Bar, et aulcunes des aultres dames, luy donnerent grant foison de beaux joiaulx et riches au departir.
¶ Quant le dit messire Jehan de Haynault et sa compaignie furent venus a Douvres, ilz monterent tantost es nefz pour passer oultre pour le desir que ilz avoient de venir a temps et a point a ce tournoy qui devoit estre a Condet, et emmener avecques luy avecques luy XV jeunes et preux chevaliers d’Angleterre pour estre a ce tournoy avec luy et pour eulx acointer des seigneurs et des chevaliers qui la devoient estre. Si leur fist toute l’onneur et compaignie qu’il pot et convoierent deux foiz celle saison a Condet puis qu’ilz furent venus.
¶ Or me veuil taire de messire Jehan de Haynault jusques a tant que point revendra et revendray au jeune roy Edouart d’Angleterre.
SHF 1-22 syncAprés ce que messire Jehan de Haynault se fut party du jeune roy et de madame la royne sa mere, le dit roy et la royne gouvernerent le paÿs par le conseil du conte de Kam, oncle du roy, et par le conseil de messire Rogier de Mortemer, qui tenoit terre grant en Angleterre, bien VIIM livres de revenues, ung estrelin pour ung denier, et avoient tous deux esté bannis et enchaciéz d’Angleterre avecques la royne et le dit roy, si comme vous avéz ouy. Et userent aussi par le conseil de messire Thomas Wage et par le conseil de plusieurs autres que on tenoit les plus saiges du païs, combien que aucuns autres en eussent envie. Car on dit que Envie ne fut oncques morte en Angleterre, aussi regne elle et voit on regnier en plusieurs aultres paÿs. Ainsi passa l’iver et Karesme jusques a Pasques et furent le roy et madame sa mere et tout le païs en paix ce terme.
¶ Advint que le roy Robert d’Escoce qui avoit esté moult preux et qui avoit moult souffert contre les Anglois et moult avoit esté de fois dechacié et desconfit ou temps du bon roy Edouart, tayon et ce jeune roy Edouart, estoit devenu moult viel et malade de la grosse maladie, pb 10 r