pb 9 rtindrent pour contens. Et avecques ce elle leur fist rendre l’extimacion de leurs chevaulx, qui les vouldrent laissier, si hault que chascun vouloit estimer les siens sans debat ne sans dire ne trop ne pou, et tous furent paiéz en deniers appareilliéz. Si demoura le dit messire Jehan de Haynault a la priere de la royne a petite compaignie de ses gens entre les Anglois, qui leur faisoient tousjours bonne chiere et toute l’onneur et la compaignie qu’ilz pouoient. Aussi faisoient les dames du paÿs dont il y avoit grant foison, contesses et aultres, grans et gentilz dames et pucelles, qui venues estoient accompaignéz madame la royne et venoient de jour en jour. Car il leur sembloit que le gentil chevalier l’eust bien desservy, ainsi comme il avoit.
SHF 1-20 syncAprés ce que le plus des compaignons de Haynault se furent departis et le sire de Beaumont demouré, la royne d’Angleterre donna congié aux gens de son paÿs que chascun ralast en sa maison et en ses besongnes, exceptéz aulcuns chevaliers et barons qu’elle detint pour soy conseillier et leur commanda que tous venissent a Londres le jour de Noel a une court qu’elle vouloit tenir et tous ceulx qui se partirent luy en convenancierent et plusieurs aultres a qui la feste fut mandee.
¶ Quant ce vint au Noel, elle tint une grant court ainsi qu’elle avoit dit. Sy y vindrent les contes, chevaliers et nobles d’Angleterre, les barons et conseulx des bonnes villes. Ceste feste et assemblee fut faicte pour tant que le paÿs pouoit longuement demourer sans seigneur et que on mettroit en escript tous les fais et les euvres que le roy qui estoit en prison avoit fais par mauvais conseil, et toutes ses usaiges et maintenances et comment il avoit gouverné le paÿs pourquoy on le peust lire en plain palais pardevant tous ceulx du paÿs et que les saiges du paÿs peussent sur ce prendre bon advis, et encores comment et par qui le païs seroit gouvernéz de la en avant. Ainssy que ordonné fut, il fut fait., et quant les cas et les fais que le roy avoit fais et consenty a faire et tout son maintien et son usaige furent leuz et bien entendus, les barons, les chevaliers et tout le conseil du paÿs se trahirent ensemble a conseil. Et s’accorda la plus saine partie et mesmement les grans barons et nobles avecques le conseil des bonnes villes, selon ce que ilz avoient la ouy lire, et qu’ilz sçavoient la plus grant partie de ses fais et de ses maintiens de certain et par pure verité estre vraie, ilz distrent que tel homme n’estoit jamais digne de porter couronne ne d’avoir nom de roy. Mais ilz se accorderent a ce que son ainsné filz, qui la estoit present et estoit son droit hoir, feust tantost couronnéz ou lieu du pere. Mais qu’ilz print bon conseil et saige et feable entour luy, par quoy le paÿs et le royaume de la en avant feussent mieulx gouvernéz que esté n’avoient. Et que le pere feust bien gardé et honnestement tenu, tant comme vivre il pourroit, selon son estat.
SHF 1-21 sync Comment le roy Edouart fut couronnéz, et comment a messire Jehan de Haynault fuirent donnéz IIIIC mars d’esterlins de revenue. Et comment le roy d’Escoce deffia le jeune roy d’Angleterre.Ainsi que accordé fut par les barons plus haulx et par les conseulx des bonnes villes, fut fait. Et adonc couronnéz de couronne royalle dedens le palais de Westmoustier deléz Londres, le jeune roy Edouart, qui tant a esté eureux et fortunéz en armes. Ce fut l’an de Grace Nostre Seigneur mil IIIC XXVI, le jour de Noel. Et pouoit avoir adoncques environ XVI ans, il les ot a la Conversion Saint Pol aprés. Et la fut tresgrandement honnoré et servy du gentil chevalier messire Jehan de Haynault, de pb 9 v