pb 84 rclamoit Regnier de Maulain. Et estoit chastellain d’un autre petit fort appellé Fairet, qui siet a moins d’une lieue prés de Rocheperion.

¶ Quant cest Regnier entendi que les Anglois et les Bretons assailloient son frere, il fist armer les gens jusques a quarante. Si issi hors et chevaucha pardevers Rocheperion pour adventurer et pour veoir s’il pourroit en aucune maniere valoir a son frere ne aidier. Si luy advint si bien qu’il survint sur ces chevaliers et escuiers navréz et sur leur mesgnie qui gisoient dessoubz le chastel en ung pré. Si leur courut sus et prist les deux chevaliers et escuiers navréz. Et les fist apporte et amener pardevers Fairet en prison, ainsi bleciéz qu’ilz estoient. Aucuns de leur mesgnie s’en fouirent a messire Gaultier de Manny et les aultres chevaliers qui estoient grandement ententis d’assaillir. Et leur dirent l’aventure comment on emmenoit ces chevaliers et escuiers devers Fairet en prison et comment ilz avoient esté pris.

¶ Quant ces chevaliers entendirent ces nouvelles, ilz furent trop durement courrouciéz. Si firent cesser l’assault et se mistrent a aler tant qu’ilz porent que mieulx mieulx devers Fairet pour raconsuir ceulx qui emmenoient ces prisonniers. Mais ilz ne se porent tant haster que le dit Regnier de Maulain ne feust rentré en son chastel atout ses prisonniers qu’ilz feussent la venus. Quant ilz furent la venus, l’un devant l’autre, ilz commencierent a assaillir, ainsi travilliéz qu’ilz estoient. Mais petit ysirent adoncques; car le dit Regnier et ses compaignons se deffendrient si vassaument que merveilles estoit a regarder. Et ja estoit tart et tous estoient travilliéz et lasséz durement. Si orent conseil qu’ilz se deslogeroient et resposeroient celle nuit pour assaillir l’endement.

Girard de Maulain sot tantost que ces seigneurs furent partis de la et du beau fait pour luy dont il ot grant joye. Et sot aussi que les Anglois s’estoient restrais devant Fairet pour le conquerre. Si s’appensa qu’il feroit ainsi beau service a son frere comme il luy avoit fait. Si se monta une nuit sur ung cheval et tant fist qu’il vint devant le jour a Dignant et tant fist qu’il parla tantost a messire Pierre Portebuef, son bon compaignon, qui estoit cappitaine et souverain de Dignant, avecques luy comme vous avéz ouy dessus. Si luy compta l’aventure et pourquoy il estoit la venus. Orent conseil que si tost que jour seroit il assembleroit tous les bourgois de la ville et leur demonstreroit la besongne et les feroit armer a son pouoir pour aler desassegier le chastel de Fairet. Quant grant jour fut et tous les bourgois furent assembléz en la halle de la ville, Girard de Maulain leur demonstra la besongne si bellement que les bourgois et soudoiers l’entendirent et firent d’acord d’eulx armer et de partir tantost et d’aler la ou il les vouldroit mener. Puis firent sonner la bancloche et s’armerent toutes gens. Puis issirent hors et se mistrent en voie tant qu’ilz porten devers Fairet. Et estoient bien six mille hommes, que ungs que autres. Messire Gaultier de Mauny le sceut tantost par une espie. Si orent conseil ensemble pour regarder et adviser quelle chose leur seroit bonne pb 84 v