The Hartlib Papers

Monsieur et treshonoré frere,           nos actions de demain me portent au laconisme, Ie vous prie de m'aduiser si seres encores Ieudy a francfort. vous remerciant de la communication, Ie doubte de ce nouueau Electeur, et de l'ottroy a Hambourg, et me resiouis de ce qui se traite en Angleterre et de la defense en Dannemarc, Dieu vueille qu'ainsi soit, si mon relieur eust eu loisir, Ie vous enuoie ce consensus couuert, Ie ne scay si en poures recouurer ches le sieur Clemens Schleich en la boutique des Wechels, Ils ont eu acheté les liures de Woegelin, I'en auois vn relié mais Ie l'ay donné a Monsieur Wilthius, s'il ne s'en trouue, et en aies besoin, et le desirés Ie le feray remetre soubs la presse en ce lieu, penseries vous pas que pour l'acheminement du bon desir et dessein, Il seroit expedient qu'Il fut veu de plusieurs? I'en ay fait veoir en Swede et ailleurs tant que I'ay peu, estimant que si en pouuions obtenir autant par toutes les Eglises Euangeliques, que nous paruiendrions plus aisement a l'accord desiré, si non en tout, du moin a ne nous dechirer, mais a nous defendre contre nostre ennemi commun, et a rendre nos oraisons et autres exercices de pieté plus agreables a Dieu, lequel Ie prie d'auoir pitié de son Eglise et de nous tous en icelle, pour nous y sanctiffier et vn iour glorifier, Ma famille vous salue avec moy et ie suis vraiement

           Monsieur et tres cher frere

                        Vostre humble seruiteur

                         et entier ami   Du Boys.

De hanau le 24 Xbre 1632/

               3. Ian.

A Monsieur

   Monsieur Duré, fidele Ministre

   de Iesus Christ,    a present

              A francfort.

franca/.

     1632

    Du Boys

Scr. Han. ------- 24. Xbr.

Acc. Francfort----- 25. Xbre