| Title: | Letter, John Jonston To Hartlib, In Latin |
|---|---|
| Dating: | august 1633 |
| Ref: | 44/1/2A-B |
[44/1/2A]
Salutem Plurimam Præstantissime Domine Hartlibi.
Dederam nuper ad Te binas, receperis nec ne ignoro. Responsorias sanè nullas a te hactenus habeo. Manuscriptorum Verulamianorum promissum multum tetigit Dominum Comenium. Petit itaque ut quamprimum per bonam manum cures. Nova seminarii editio Dantisci prodiit, & puto Te vidisse. Promisit & additamenta quædam sub vestibuli titulo. Anchoranum audio versionem sylvæ sylvarum Verulamii tentare. Fac quæso sciam. De Dominò Reinero necquicquam adhuc: qvamvis sciam aliquid in Logicis Didacticum tentare. Sed si subsidio figurarum agit, fallitur. Optimè Logica & felicissimè docetur promissa rerum notitia. Num Leydenses ista non curant. Ego intentus aliis non possum; nisi forte in Medicina. Latorem harum Dominum Georgium Lætum [Gnosorum? Dominorum? unclear] [2 illegible words] Tibi amicissimè commendo. Consilio & auxilio juvabis quacunque in re poteris. Meretur vel eo quod literatus. Obstringes me & eum maximè. De Domino Hunniade nihil planè audivi. Quæso si Londini adhuc moratur, fac certiorem, & saluta. Puto ipsum per Dominum Vechnerum tuas Literas jam accepisse. Tu ipse Vale & mihi cum Domino Læto fave.
Lugduni mense Augusto 1633
Tuus
Ionstonus
[44/1/2B]
Præstantissimo Viro
Dominò Samueli Hartlibio amico
honorando
[squiggle?]
Londinum
in Dukes place.
par amj
[seal]