| Title: | Copy Extract In Hand A, Poleman, In Latin |
|---|---|
| Dating: | 18 July 1659 |
| Ref: | 16/9/1A-2B: 2A-B BLANK |
[16/9/1A]
Calx viva Polemanniana. Amst: 18 Iuly. 59.
Processus calcis vivæ placet mihi imprimis, qvòd si libeat Illustri Domino Boyle me cætera fideliter edocere, & processus ille finem Optatum asseqvitur, ingens hic est thesaurus pro calculosis; qvapropter instet Dominus saltim apud Dominum Boyle, de fideli et candida informatione, siqvidem egomet hanc descriptionem (excepto sale ex virgultis vitium) Basilij jam olim multis abhinc annis magnâ diligentiâ elaboravi, qvod neutiqvam mihi successit ex voto, qvare aliam methodum inveni, secundùm qvàm Magisterium calcis paravi, de qvo libenter transmittam Domino, qvantum volet, sed virtus ejus non eousque se extendit, sicuti Dominus de præparato Ludo Helmontiano refert, verùm hoc insuper habito transmittam eqvidem Domino qvàmlubentissimè, si opus sit atque illud expetat, qvod per proximum tabellarium indicare ne pigeat, & faciam ne sit in me mora. Virtus ejus consistit in hoc qvod totum
[16/9/1B]
hominem potenter roborat, atque imprimis ventriculum, & spiritibus tantùm robur conciliat, ut ipsi calculum - ex loco, ubi latet expellant, sed calculum nullatenus dissolvit aut liqvefacit. Aperit qvidem omnes obstructiones hæmorrhoidum; fluxus foeminei, ureterum, mesenterij, hepatis & omnium viscerum validè, sed de calculo nihil solvit, nisi qvia totam Naturam potentissimè corroborat, qvæ postmodùm ipsa calculos protrudit, per vias sibi notas et conscias, atque hoc modo vim suam exeruit non modò apud Dn: Hübnerum, sed et plurimos alios, & præterea specificum est stomachicum, qvod concoctionem insigniter promovet, & ventriculum firmat imprimis./.