du roy
d’Angleterre; si en sera creus, car il est saiges et puissant,
et les Anglois et les Anglois, a ce qu’ilz monstrent, sont tout lassé de guerroier. Si se taille bien la chose
parmy le mariaige de Berry et de Lancastre, que une bonne
paix entre France et
Angleterre en viengne, et nous
demourons en la guerre, car le duc de Lancastre vouldra servir le calenge de
Castille, et le droit qu’il y a, il le donra a sa fille, ainsi serons nous
en la guerre des
François et des
Anglois."
¶ Touttes ces doubtes mettoient les pluseurs avant ens ou
royaulme de Castille, et ja
estoient retourné en France, de trop grant temps, tous chevaliers et
escuiers, lesquelx avoient esté servir le roy en sa guerre, si comme il est
contenu ycy dessus en nostre hystoire. Or fut dit au roy de Castille des plus
especiaulx de son conseil: "Sire, sire, entendéz a nous. Vous
n’eustes oncques si grant mestier d’avoir bon conseil que vous avéz pour le present, car une
bruine trop felle et perilleuse se nourrist entre vous et le duc de Lancastre, plus
grande asséz que elle n’y soit; et est ja toutte engendree, et si vient du costé de France." "Comment", dist le roy, "puelt il estre", qui se vuet
enfourmer de la verité. "En nom Dieu, sire, renommeee cuert parmy ce paÿs, et ailleurs aussy, que le
duc de Berry se marie a la fille du duc
de Lancastre, vostre cousine,
et vous devéz bien croire que ce ne se fait point
ne fera sans tres grandes aliances. Sy pouréz ou temps avenir, tout ce y doit on ymaginer, estre
aussi
recueilliez par les
François que vous en avéz esté avanchiéz."
¶ Le roy de Castille sus ces parolles fut moult pensieux et veoit bien que on luy
disoit et monstroit verité; et demanda conseil a ceulx qui en espece de bien luy avoient tout ce
recordé, et comment pour le mieulx on s’en pourroit chevir et ordonner. Cilz le conseillierent
loyaulment, selon la nature du fait et que la matiere demandoit, si comme je vous dyray.
Vous savéz, si comme il est cy dessus bien derriere en nostre hystoire traittié,
comment le roi Henry d’Espaigne s’appaisa au roi Pierre d’Arragon. Par
cest appaisement le roi d’Arragon donna sa fille au filz du roi de
Castille, ce fut ce Jehan qui pour le present est roy, et parmy la conjunction de mariaige
demourerent ils en paix, eulx et leurs royaulmes.
¶ Ce Jehan, filz au roy Henry, eubt de ceste fille d’Arragon ung filz, et puis se mourut la dame.
¶ Apréz la mort de la dame et la mort du roy Henry, le roy Jehan de
Castille, par le conseil de ses hommes, se remaria a la fille du roi Ferrant de
Portingal, madame Beatris, en ceste qu’il eubt damme Alienore
pb 282 v