de Couchy et les barons de
France qui du destroit et secré conseil estoient, si eurent pluseurs collations
ensamble de parlemens, tant pour l’estat de
Guerles ou le roy
avoit tres grant ymagination d’aler, que pour le duc de Bretaingne que on ne pooit
mettre a rayson et qui ne vouloit obeïr. Et ne savoit on vers luy qui envoier pour traittier
sagement et doulcement, et aussy que il voulsist croire; car ja y avoient esté pluseurs hommes
vaillans et saiges, et qui bien s’en estoient acquittié de remonstrer droitture et ce pourquoy ilz
avoient la esté envoyéz; mais tout estoit retourné a neant, car on n’y avoit riens besoingniet de
cler ne esploittié, dont le conseil du roy estoit tout troublé; car on entendoit que le duc de Bretaingne avoit, tout l’iver et tout le temps, pourveü ses villes et ses
chastiaulx, et monstroit par ses apparans qu’ilz avoient plus chier la guerre que la paix. Si
disoient bien les plus saiges du conseil de France: "On parolle d’aler en
Alemaigne, mais on devroit parler d’aler en
Bretaingne et ruer jus de
tous poins ce duc qui est si haustres, et a tousjours esté contre la
couronne de
France, que il ne vuelt obeïr ne daingne. On n’ara ja nulle raison de luy, se on ne le met
en luy tout son malgré oultre, et se on ne luy met, il est par trop presumptueux. Il n’aime ne
prise nulluy, c’est une chose toutte clere. Se le roy va
en
Alemaingne et il desnue son royaulme de gens d’armes ainsi que il convient
que il face, car il n’y puelt pas aler, s’il n’y va tres grandement bien pourveüs, cilz duc de
Bretaingne mettra les
Anglois en son paÿs, et entreront en France, et ja davantaige en sont les apparans tres grans, car
il y a
une grosse armee de gens d’armes et d’archiers anglois sus la mer, laquelle ne se departe point
des bendes de
Bretaingne, tant que ilz le peussent amender et, ou que la mer
et grans vens les boutent, tousjours retournent ilz devant
Bretaingne et se
tiennent la a l’ancre. Si convient et est de necessité que on ayt a luy guerre ouverte ou la paix." Et distrent les aulcuns qui grandement ymaginoient ce fait: "Ce seroit bon que de
rechief on y envoyast l’evesque de Lengres et le conte de Saint Pol, car ce duc et le conte avoient ja par mariaige deux serours." "Nennil," respondy messire Yves Dorient qui estoit vray
Breton, "puisque de rechief vous vouléz envoier devers le duc, vous n’y poéz
envoier meilleur traitteur ne plus aggreable pour luy que le
seigneur de Coucy, car
autant bien eurent ilz aussy ja deux serours et se sont tousjours
entr’amé, et soloient les ung a l’autre, quant ilz
escripsoient biau frere. Et aveuc le seigneur de
Couchy mettréz y qui que vous vouléz."
¶ "Or nomméz maistre Yves",
pb 278 v