fussent en nulle suppechon du roy de Castille, ne de son conseil,
car ilz n’airoient ja, ne ne feroient, ne avoient fait au roy d’Angleterre chose qui
peust corrompre, ne brisier, ne entammer, ne canceller par nulle voye quelconque les aliances
qui estoient faictes, jurees, escriptes et sceellees entre France et
Castille. Mais, se le roy d’Espaigne marioit son filz a la fille
du duc de Lancastre, et faisoit paix a luy du costé du calengne que le duc
demandoit au
royaulme de Castille depar sa femme, tous ses
paÿs generalment le conseilloient, s’i assentoient et le vouloient; et ce ne devroit pas
desplaire au roy de France, ne a son conseil, car tousjours et en touttes
choses le roy de Castille vouloit demourer, et aussi vouloient et vueillent
conjointement ses gens, par fourme ordonnance et aliance avecques et deléz le roy de
France et les
François.
¶ Telle fut la substance de la responce que messire Jehan de Vianne raporta en France, et le roy de Castille et le duc de Lancastre
procederent avant en leur mariaige, et firent paix amiablement ensamble par les moyens et
traictiéz de
Castille dessus nomméz; car le duc de Lancastre se
tenoit tousjours en la marche de
Bourdiaulx, et vint de
Bayonne a
Bourdiaulx, la duchesse et sa fille, ou ilz
furent recheu a grant joye, car on le de
siroit ens ou paÿs; et puis depuis de
Bourdiaulx ilz vindrent a Lieborne.
Quant les vrayes et certainnes nouvelles furent venues et sceues en l’ostel du
conte de Foix, que le roy de Castille s’accordoit et appaisoit au duc de
Lancastre, et marioit son filz a la fille du duc de Lancastre et luy
donnoit grant terre et grant paÿs en
Castille et grant nombre de flourins,
environ deux cens mille nobles, si en fut le conte moult esmerveilliéz,
car pour ces jours je y estoie et sejournoye, et dist le conte de Foiz: "Che roy de Castille est ung grant chetif; il a fait paix a ung homme mort." "Car je sçay bien", dist le conte de Foiz, "que le duc de Lancastre
estoit en tel party et en tel dangier qu’il ne se pooit
aydier." "Par ma foy," dist le conte, "c’est un saige homme ce duc de Lancastre, car
vaillaument et saigement il s’est portéz en ceste guerre."
SHF 3-303 sync
¶ Or advint que environ le Noel l’armee du conte d’Arondel, qui
toutte la saison s’estoit tenue sus la mer, wancrant et frontiant le
paÿs de Bretaingne,
de La Rocelle, de
Saintouge et de
Bourdelois, s’avalerent en
Normendie et passerent devant Quarentin; mais avant avoient ilz pris terre a Thierebourch et vouloient faire
aulcunes armes la ou paÿs. De la ville et de la garnison de Quarentin estoient
gardiens et sou
pb 338 r