SHF 3-294 sync
Vous savéz, si comme il est ycy dessus contenu, que le duc de Jullers
s’absenta au roy de France parmy les traittiéz et moiens des prelas
qui s’en ensonnierent et du duc de Lorrainne, au voir dire, son cousin, qui y rendy grant painne et qui l’ala querre a
Nideke et l’amena
avecques l’archevesque de Couloingne parler au roy et a ses oncles. Et si savéz aussy comment il proumist a aler devers son filz, le duc de Guerlles, et de luy faire venir a merchy et a raison, ou, conjointement avec le roy, il luy
feroit guerre; et fere convenoit au duc de Jullers ce marchié, car aultrement tout son paÿs eust esté destruit et perdus.
¶ Le duc de Jullers s’ordonna et appareilla, l’archevesque de Couloingne
en sa compaingnie, et s’en allerent en
Guerlles, et passerent les rivieres unes
et aultres et vindrent a
Nymaye ou le duc se tenoit, qui les rechupt
moult liement et moult grandement, ainsi que bien le sceut faire et que faire le devoit aussi; car
riens on n’est plus prez que pere et mere, et ja estoit enforméz que le duc de Jullers, son
pere, estoit accordé et composé au roy de France, dont il n’estoit pas plus liés,
mais maltalent ne l’en osoit monstrer.
¶ Le duc de Jullers et l’archevesque de Couloingne luy re
monstrerent tout au lonc de la matiere le peril et en quel parti toutte sa terre estoit.
De commencement il n’en fist compte, car il s’estoit si fort conjoins et aloiéz au roy
d’Angleterre qu’il ne s’en pooit partir, ne vouloit aussi, car tout son cuer estoit tout
anglois, et s’excusa trop fort et dist bien que il vouloit attendre l’aventure, et que, se par la
venue du roy de France il avoit ung grant dommaige, il estoit jonnes; si le pooit bien
porter et amender ou temps avenir sus le
royaulme de France ou sus ses
conjoins les
Braibançons, et dist que nul sire ne puet guerroier sans
dommaige; une foiz perte et l’autre gaaingne.
¶ Quant le duc de Jullers l’oy ainsi excuser et langaigier, si fut tous courrouchiéz et
luy demanda: "Guillaume, de qui feréz vous vostre guerre, ne qui sont
ceulx qui vous amenderont vos dommaiges?" Il respondi: "Le roy d’Angleterre et sa puissance. Et encoires suy je esmerveilliéz de ce que de piecha je n’ay nulles
nouvelles de l’armee de mer; car, s’ilz fussent venus, ainsi que promis on le m’avoit, je eusse
ores une fois ou deux resveilliet les
François." "Guillaume, attendéz vous cela?" dist le duc de Jullers. "Les
Anglois sont si ensonniéz de tous léz qu’ilz ne sevent auquel entendre.
Veéz cy le duc de Lancastre, nostre cousin, qui
pb 314 r