d’Escoce, laquelle ne fait pas a oublier, celle nuit, par incidence de
fortune, et ainsi que les merveilles aviennent en armes et en amours. Messire Jaques de
Lindesee puet bien dire: "Au matin je cuidoye avoir gaingié, mais j’ay asséz perdu a
poursievir les
Anglois. " Je vous diray pourquoy.
¶ Si trestost
comme il ot pris congié a messire Mahieu Rademen et que il
se fut departis de luy, il entreoublia son chemin, et entra en unes bruieres de broussis et de
petit bois, et perdi de tous poins son chemin, et bien s’en perchut, mais ce fut trop tart. Et
entra en ung sentir qui tiroit tout droit au Noefchastel et prist celui, car il cuidoit estre a
l’encontre de Cebourch ou leurs gens estoient logiéz, mais non estoit, car il
s’eslongoit. Et ce fut a celle propre heure que l’evesque de Durem retournoit au Noefchastel, si comme yci dessus je vous ay dit. Le cheval de messire
Jaques de Lindesee qui senti les chevaux des
Anglois, commencha a
hennir et a frapper du piet en terre, et tourna celle part ou les chevaulx anglois estoient; et
cuida, messire Jaques de Lindesee que ce fussent leurs gens, et qu’il fust joindant de Cebourch, mais non estoit, car il se trouva ailleurs enclos tantost de l’evesque de Durem
et de ses gens, et de l’evesque proprement qui se
mist tout devant quant il vey l’ombre du cheval, car il estoit nuit et brun, et demanda en
venant, qui estoit la. "Il fault qu’il soit amis ou ennemis, ou hiraulx ou menestreulx." Messire Jaques respondy, qui n’avoit encoires nulle cognoissance de l’evesque, et dist: "Je suy Jaques de Lindesee." "Chevalier,
vous nous estes li bien venus", dist l’evesque de Durem, "et je vous preng
pour mon prisonnier." "Et qui
estes vous?" dist le chevalier
d’Escoche. "Je suy Robert de Noefville, prestre et evesques de Durem."
¶ Messire Jaques de Lindesee vey bien que deffense ne luy valoit riens, car il estoit
enclos encoires de eulx LX Si dist ainsi: "Et puisqu’il convient qu’il soit,
Dieux y ait part!" Adont tout en chevaulchant, le evesque de Durem, et entrant
ens es faubours du Noefchastel, luy demanda du convenant des
Escoçois, et quel chose l’avoit ammené jusques a la. Tant que a respondre du
convenant de ses gens il n’en savoit riens et s’en teut, mais il dist qu’il avoit poursievy messire Mahieu Rademen. Dist adont l’evesque.: "Ou est Rademen?" "En nom Dieu," dist il, "je ne le vey puis que je l’euchs fianchié;
il s’en retira au Noefchastel et je m’en aloye a Ocebourh." "Ce m’estoit vis, en nom Dieu; vous aviéz pris mal le chemin, car
pb 330 r