bel damoisel, et une sienne seur qui s’appelloit Blance; si fuy enfourméz des deux
parties, et tout en la saison que la bataille avoit esté, et bien se concor
doient les ungs et les aultres, mais ilz me dirent que ce fut une aussi dure besoingne et
aussi bien combattue que nulle bataille peust oncques estre; et je les en croy bien, car
Anglois d’ung costé et
Escoçois d’aultre costé sont tres bonnes gens
d’armes, et quant ilz se treuvent ou rencontrent ou party d’armes, c’est sans esparengnier; il
n’y a entre eulx nul ho. Tant que lances, haches, espees ou dagues et alainne
puevent durer, ilz fierent et frappent l’ung sus l’autre. Et quant ilz se sont bien battu et asséz
combattu et que l’une partie obtient, ilz se glorifient si en leurs armes et sont si resjoÿs que sus
les champs ceulx qui sont pris et fianchié, sont raenchonnéz, et savéz vous comment? si tres
courtoisement que chascun s’en contente de son compaingnon et que au departement ilz dient
grant merchys. Mais en combatant et en faisant armes l’ung sus l’autre il n’y a point de jeu ne
d’esparngne, ainçois est tout acertes; et bien le monstrerent la, ainsi que je vous diray avant
que je me departe de la besoingne, car ce rencontre fut aussi bien demené au droit d’armes que
nulle chose pouoit estre.
SHF 3-287 sync
Moult estoit prest et ententieu et de bonne voulenté chevaliers et escuiers d’ung
costé et d’aultre a faire armes et eulx combattre vaillaument et ardaument tant que haches et
lances leur duroient. La n’avoit couardise point de lieu, mais hardement rioit en place des
belles appartises que ces jonnes chevaliers et escuiers
faisoient. Et estoient si joint
l’ung a l’autre et si athaciéz que trais d’archiers n’y avoient point lieu ne d’ungs ne d’aultres,
car ilz estoient si prez assambléz que main a main et l’ung dedens l’autre, et encoires ne
branloit nulle des batailles, mais se tenoient ferme et fort chascun sus son pas.
¶ La monstroient bien
Escoçois vaillance et hardement, et a parler par raison
que ilz se combatoient liement et de grant courrage, car les
Anglois pour ce
fait estoient troix contre ung. Je ne dy pas que les
Anglois ne s’acquittassent loyaulment, car partout ou ilz se sont trouvéz, par grant
temps a tant que en armes, ilz ont bien fait leur devoir, et aroient trop plus chier a estre mort
ou pris sus la place quant ilz sont en bataille, que dont que on leur reprouchast fuite.
¶ Ainsi que je vous dy que la banniere de Douglas et la baniere de Persi s’estoient encontrees, et gens d’armes des
pb 323 v