la marche, plus de XV jours, et mengierent grandement les
biens et les vivres du paÿs, quoyque de
Portingal leur en venist asséz.
¶ Or estoient ainsi ces deux seigneurs et leurs deux
hosts en
Galisse et apovrissoient le paÿs de vivres, et tousjours s’eschaufoient
les jours tellement que depuis tierche nulz n’osoit chevaulchier pour la grant chaleur du soleil,
se il ne vouloit estre tous ars. Et le duc et la duchesse et les dames se
tenoient a Aurench, et leurs gens sus les champs qui estoient en grant
povreté, dangier et mesaise de vivres pour eulx et pour leurs chevaulx; ne les herbes ne nulles
doucheurs de raffresquissement ne pouoient yssir hors de terre, tant estoient les terres dures et
seiches et arses du soleil, et ce qui en yssoit ne fructifioit riens, car la grant challeur du temps
de l’air l’avoit tantost bruit. Et, se les
Anglois vouloient avoir vivres pour
eulx ne pour leurs chevaulx, il leur convenoit leurs varléz ou leurs fourrageurs envoier XII ou XVI ou XX lieues loings. Or regardéz la grant
paine, et trouvoient ces chevaliers et escuiers d’
Angleterre les vins ardans et
fors, qui leur rompoient les testes et secquoient
les entrailles et leur ardoient les
foies et les poumons, et se n’y savoient ne pouoient remedier, car ilz trouvoient petit de
bonnes eaues ne de fresches pour temprer leurs vins ne eulx raffresquir. Ilz estoient arrivé tout
au contraire de leur nature, car
Anglois en leur paÿs sont
nourryz doulcement et moistement et ilz estoient la nourry d’ardeur et de chaleur dedens et
dehors. Si eurent, moult de povretéz tout les plus grans seigneurs qui y furent, et de deffaulte
de leurs aises hors de ce qu’ilz avoient aprins et tant que en fin de querelle ilz le monstrerent,
si comme vous recordray comment il leur emprist.
Quant chevaliers et escuiers d’
Angleterre veirent le meschief qui
leur approchoit et le dangier de vivres et la grant chaleur du soleil qui tousjours monteplioit, si
commencierent a murmurer et a dire en l’ost en pluseurs lieux: "Nostre chevaulchie se
taille et ordonne trop bien de venir a povre fin, car nous sejournons trop en ung lieu." "C’est verité," disoient les aultres, "il y a deux choses contraires pour
nous. Nous menons femmes en nostre compaingme et avons mené qui ne demandent que le
sejour, et pour ung jour qu’elles cheminent, elles en vueillent reposer XV. Ce
nous gaste et gastera, car si tost que nous fusmes arrivé a La Caloingne, se
nous eussions avant chevaulchiet sus le paÿs, tousjours devant nous, nous euissions bien
exploittié et mis le paÿs en nostre obeïssance, ne nulz ne nous fust aléz au devant; mais les
longs sejours que nous avons fait ont renforciéz nos ennemis, car ilz se sont fortefiéz et
pourveü de
gens
pb 225 v