que ses terres, qui pour le present sont moult chargiéz et ensonniéz envers
Lombars et aultres gens, par le point, article et ordonnance du mariaige touttes les
acquitte et delivre et nettoie de toutes debtes, et tout ce que obscur luy
face cler. La Dieu merchy, tant que parmy la puissance
des deniers il est bien en moy et suy en bonne voulenté de faire. Mais je vueil tout
premierement que les convenances et ordonnances soient si fermement prises, escriptes,
grossees, tabellionnees et scellees, que jamais en ruine ne en debat de touttes parties elles ne
puissent enccoir ne venir; c’est que ma fille sera hiretee de toute la
conté de
Guerles, ainsi que elle s’estent et comprent dedens les
bonnes et, s’il avenoit
chose que le conte Regnault de
Guerles alast de vie a trespas devant ma fille, sans hoir de sa char, que ma
fille paisieublement tenist et possessast comme son bon heritaige la
conté de Guerles tout son vivant, et, aprés son decés, elle retournast la ou elle devroit aller. Et oultre je dy
et vueil encoires, sus le fourme et setille des confirmacions, que se ma fille a hoir ou
hoirs de honnouré et prince le conte Regnault de Guerles, et ma fille voist
a trespassement, que pour quelconque mariage que le conte Regnault face
secondement, on ne puist tollir, eslongier, oster ne desheriter l’oir ou les hoirs qui
de
ma fille seront yssus et venus, fors tant que je vueil bien que, sa plaisance et voulenté
y soit le meult a remarier pour tant que on doit douer sa femme, la seconde
femme il pourra douer des hiretaiges, terres acquises oultre la
rieviere de Muese,
marchissans a l’
eveschié de Liege et a la
duchié de Brabant sans en riens
chargier la principale seignourie de
Guerles. Et la ou les proismes de
honnouré prince de Guerles vouldront seeller, ceulx qui cause pourroient avoir, par
proismeté, au calange de la
conté et seignourie de Guerles, et aussy les bonnes
villes du paÿs, et aussy pour entretenir les devises et convenances devant dictes, je m’y
assentiray au mariaige. Si poéz respondre ad ce, se vous en estes chargiéz."
¶ Adont respondirent les chevaliers qui estoient de la
conté de Guerles, quant ilz
eurent ung petit parlementé ensamble, et parla l’ung pour tous, et dist celuy: "Vostre
response avons nous bien entendu et oÿe, mais nous n’avons pas la
charge de riens
confremer ne aconvenenchier si avant, comme vous requeréz. Si retournerons devers monseigneur et son conseil et luy ferons ceste response, et hasteement vous en
auréz nouvelle." Respondy Bertrans: "Dieux y part! et je le vueil
bien." Sus cest estat ilz yssirent hors de la chambre.
pb 244 r