d’Espaingne. ¶ Publiet fut partout que touttes gens d’armes se pouoient bien partir et devoient yssir hors d’Espaigne et retourner en France, car il estoit ainsi ordonné et accordé des souverains; mais encoires demouroient messire Olivier de Clayquin, connestable de Castille, et le mareschal et environ IIIC lances de Bretons et de Poitevins et de Saintongiers. ¶ Or se mist au retour le duc de Bourbon, quant il eut pris congiet au roy et a la royne et aux hiraulx, barons de Castille. Si fut aconvoiéz jusques a Groing et entra en Navaire. Partout ou que il venoit, ne passoit, il estoit le bien venus; ce duc a ou avoit grant grace d’estre courtois et garnis d’onneur et de bonne renommee. ¶ Le roy de Navairre le rechupt moult grandement et liement, et ne luy monstra onques samblant de maltalent ne de haynne qu’il eust contre le roy de France qui luy avoit fait toullir son hiretaige de la conté de Wruéz en Normendie; car bien savoit que le roy, qui pour le present estoit au duc de Bourbon nepveus, n’y avoit nulles couppes, car pour le temps que ce fut, il estoit encoires moult joennes. Mais luy remonstra doulcement touttes ses besoingnes, en luy suppliant qu’il voulsist estre bon moyen envers son cousin le roy de France pour luy, et il en seroit grant gré. ¶ Le duc de Bourbon luy ot en convent de bonne voulenté, et sus cel estat il se departi de luy et passa parmy le royaulme de Navaire tout paisieblement;