aussi comment il avoit respondu, et que dedens briefz jours son
conseil venroit la et aroient les deux conseilz ensamble advis de toutes choses
et que le roy se tenoit a
Coïmbres.
Ne demora guaires de temps depuis que le roy de Portingal
envoia de son conseil devers le duc de Lancastre, telz que messire Jehan
Ferrant Percok et autres a Saint Jaques. Eulx venus, ilz distrent au duc comment le roy de Portingal estoit parti de
Coïmbres et venu
en la
cité du Port, et attenderoit la le duc ou environ a l’entree de son
païs pour parlementer ensamble. De ces nouvelles fu le duc de Lancastre tout
resjoy et fist bonne chiere aux chevaliers, et leur dist que temprement il se departiroit de Saint Jaques, si trestost comme la duchesse sa femme seroit guairie de une
petite foiblesce et de doleur de chief, qui a la fois la tenoit, et leur dist que, se ce n’eust esté, il se
fust ores departi de la et mis au chemin en approchant
Portingal. Les chevaliers
s’en contenterent et, quant
ilz eurent esté ung jour avec le duc, ilz s’en
departirent, et retournerent arriere au Port, et trouverent le roy; si
recorderent leur messaige. Le roy de Portingal, qui moult desiroit a veoir le duc
de Lancastre pour les grans
vaillances de luy et pour tant aussi que il
en pensoit a grandement mieulx valoir, manda l’archevesque de Bragues et l’evesque de Luscebonne et tous les plus saiges prelas de son royaume, pour avoir
d’encoste lui et pour plus honnorer le duc de Lancastre, car ja estoient traitiéz entaméz,
que il auroit sa fille en mariage, madamoiselle Philippe, qui fille fu a la duchesse Blanche de Lancastre; et pour ces recuillotes mieulx et plus honnorablement
acomplir, il fist faire tres grans pourveances en la
cité du Port et par toutes les villes,
la ou il pensoit que le duc de Lancastre passeroit et se logeroit. Ainsi s’aprochoient ces
besongnes. La duchesse de Lancastre avoit grant desir que le mariage se fesist du roy de Portingal et de la fille du duc de Lancastre, car bien savoit que par ce
mariage les aliances se feroient moult grandes et en seroient plus fors, et leur ennemi de
Castille plus foible; car bien avoit la dicte damme intencion et esperance que,
avant son retour, ilz conquerroient
tout le païs de Castille et n’y avoit pour le conquerre
que une journee de bataille. Si enhortoit la damme a son mary le duc ce
qu’elle pouoit et li conseilloit l’aliance et le mariage de sa fille au roy de
pb 128 r