le roy, "nous savons bien que on vous a fait blasme et dommaige et que ce est
grandement en nostre prejudice et de nostre royaulme. Si manderons temprement
noz peres de France et regarderons quel chose s’ensievra du faire; et ne vous ne soussiéz,
car vous en aréz droit et raison, comment que il se doie prendre
ne advenir." Adont prinst il le connestable par le main et le fist lever et luy dist: "Connestables, nous ne voulons pas que vous departéz de vostre office ainsi, mais
voulons que vous en uséz tant que nous arons eu aultre conseil." Le connestable
derechief se mist en genoulx et respondy: "Tres chier sire, la chose me touche de
trop prez, et tant fort. pense au blasme et dommaige que le duc de Bretaingne m’a fait,
que bonnement pour le present ne saroye ne pourroie user; et l’office est grant, et
convient respondre et parler a toutes gens qui poursievent l’office, pourquoy je n’aroye
maniere ne arroy de respondre ne de parler ainsy comme il appartient. Si le vous plaise a reprendre
et pourveir aultre pour ung temps. Tousjours suy je et seray appareilliéz en vostre
commandement." "Or, bien, bien", dist le
duc de Bourgoingne, "monseigneur, il vous offre asséz, vous en arréz avis." "C’est voirs", dist
le roy. Lors fist il lever le connestable, lequel
se traist
tout doulcement vers le
duc de Berry et le
duc de Bourgoingne, aviséz de
remonstrer ses besoingnes et pour eulx informer justement de la matere, car il en appartenoit a
eulx grandement ou cas qu’ilz avoient le gouvernement du royaulme. Mais, en parlant
a eulx et en remonstrant ses besoingnes et comment le duc l’avoit demené,
ilz se perchurent bien que la chose ne leur touchoit pas de si prez que le roi luy avoit respondu; car,
en la fin, ilz le blasmerent grandement de ce qu’il estoit aléz a
Vennes quant il
se sentoit en haynne au duc. Il respondy qu’il ne s’en pouoit excuser.
"Si fussiéz bien", dist le
duc de Bourgoingne, "ou cas que vostre
navie estoit si prest et que chevaliers et escuiers attendoient apréz vous a Lancrignier; et encoires oultre, quant vous eustes esté dedens
Vennes et disné avec
luy et vous fustes retourné a vostre hostel ou bourch et que bien vous en estoit pris,
vous ne aviéz que faire de plus sejourner ne d’aler veoir son chastel de l’Ermine."
"Monseigneur," dist le connestable, "il me monstroit tant de
biaux samblans que je ne luy osoye refuser." "Connestable," dist le
duc de Bourgoingne, "en biaux samblans sont les deceptions. Je vous cuidoie plus
soubtil que vous ne estes. Or, aléz, aléz, les besoingnes venront a bien; on y
pb 192 r