sances, leur vindrent lettres et nouvelles
du duc de Lancastre, et leur mandoit que, ces
lettres veües, en quel
estat qu’ilz fussent, ilz se departesissent et retournassent devers luy, car il attendoit dedens briefz
jours l’archevesque de Braghes et messire Jehan Radrighes de Sar, les ambassadeurs du roy de Portingal, lesquelx venoient a celle fois pour espouser sa fille et mener ent au Port la ou le roy l’attent.
¶ Quant messire Jehan de Hollande et le mareschal entendirent ces
nouvelles, si retournerent leur chemin et disrent que voirement appartenoit il bien que au
recepvoir les ambassadeurs du roy de Portingal, le duc leur sire y eust ses
gens et son conseil deléz luy. Si se misrent au retour et laissierent garnisons ens es villes que ilz
avoient conquis, et disoient que ilz n’en feroient plus jusques au may, et s’en
retournerent en la ville de Saint Jaque, ainsi que le duc leur avoit mandé.
¶ Dedens troix jours aprés qu’ilz furent venus, vindrent l’archevesque
de Bragues et messire Jehan Radrigues de Sar, et descendirent a plus de II
C chevaulx en la ville de Saint Jaqueme; tout furent a hostel,
car on avoit toutte chose ordonnee pour eulx.
¶ Quant ilz furent appareilliéz, l’archevesque et le chevalier et encoire
aultres
qui estoient venuz en leur compaignie se trairent devers l’ostel du duc et la duchesse en bon arroy, ou ilz furent recueillié a grant joye. Adont
remonstrerent ilz ce pourquoy ilz estoient la venus, et le duc y entendy voulentiers; car
de l’avancement de sa fille devoit il estre tous resjoïs, et aussy de l’aliance qu’il avoit
au roy de Portingal, qui bien luy venoit a point ou cas qu’il vouloit entrer par conquest
en
Castille.
¶ L’archevesque monstra au duc et a la duchesse et au conseil comment par procuracion il pouoit et devoit personnellement
espouser en nom du roy Jehan de Portingal madame Phelippe de Lancastre, la fille
au duc, et tant que le duc et la duchesse et leurs consaulx s’en
contenterent et y adjousterent foy. Dont, en es jours que les ambassadeurs de Portingal
sejournerent a Saint Jaqueme, messire Jehan Redrigues de Sar, par la
vertu de la procuracion qu’il avoit, espousa madame Phelippe de Lancastre ou nom et
pour le roy de Portingal, qui ad ce l’avoit constitué et ordonné; et les espousa l’archevesque de Bragues, et furent sus ung lit courtoisement, ainsi comme espoux et
espousee doivent estre. Ce fait, a l’endemain, la dame ot tout son arroy prest pour
partir. Si parti, quant elle ot prins congiet a
son pere pb 164 v