Durban, qui sciet en l’
arceveschié de Nerbonne, entre le
royaume d’Arragon et le
royaume de France droitement sur
le departement des terres, et est le dit chastel au sire de Gleon, et y vinrent si a point et de nuit, que ilz le trouverent a petite garde. Si
getterent leurs eschielles et firent tant que ilz l’eurent et en furent seigneurs, dont tout le paÿs fu
grandement effraé, et par especial ceulx de Parpegnant en Arragon, car le chastel sciet a quatre lieues pres de la. Aussi ceulx de
Lourde
prinrent en celle propre sepmaine ung chastel en Arragon a quatre lieues pres
de Barselone, lequel on appelle Chastel Viel de Robbanes, et est le chastel a la vicontesse de Chastelbon, cousine germaine au conte de Foeis. La dame fu
toute esbahie quant son chastel fu pris; si en escripsi a son cousin le conte de Foeis, que pour Dieu on li voulsist rendre, et que il li fesist rendre, car ceulx qui pris l’avoient
estoient de
son païs de Berne. Le conte de Foeis rescripsi a sa cousine que elle ne s’effreast en riens se son chastel estoit emprunté des
Englois, et que c’estoit pour herrier et mestrier
ceulx de Barselone, qui tenoient en
prison a petite cause l’arcevesque de Bourdiaux, et que bien le raroit quant temps seroit
et sans son dommaige. La damme s’appaisa sur ce,
et se dissimula,
et s’en ala demourer en ung sien autre chastel pres de Roquebertin. Ces deux chasteaulx, Chastel
Viel de Robbanes
et Durban et aussi ceulx de
Lourde herrioient grandement les
frontieres d’
Arragon. Le roy, au voir dire, s’en dissimuloit pour donner
chastiement a ses bonnes villes et tant que les bonnes villes se contenterent
mal du roy, car ceulx de Barselone, de Parpegnant ne de pluseurs autres ne
pouoient aler en leurs marchandises que ilz ne fussent pris et happéz et raençonnéz. Si s’aviserent
ceulx de Barselone que ilz delivreroient l’arcevesque de Bourdiaux, mais de
sa delivrance ilz en parleroient ainçois au roy. C’estoit raison, et traitierent tout
quoiement par voie de moyen devers le frere du roy messire Martin, le duc de Blammont lequel estoit grandement en la grace de toutes gens , que il voulsist tant faire devers son
frere le roy que ilz eussent paix a ceulx de
Lourde et a ceulx de Robbanes. Cil leur ot en convenant pour eulx tenir a amour, et fist tant devers son
frere que l’arcevesque de Bourdiaux fu delivré et renvoyé en
Bourdelois. Asséz tost aprés fist tant le conte de Foeis que la viscontesse de
Chastelbon recouvra son chastel, et s’en partirent ceulx qui le tenoient. Ce service
fist le conte de Foeis en cel an au duc de Lancastre.
Quant le roy d’Arragon vey que la contesse estoit
si tost retournee a son
pb 150 v