rade et ligier, et l’abbati sur le planchier et la viola, et en ot, oultre la volenté de la damme, ses delis. Et quant il ot fait, il li dist: "Damme, se vous faites nulle
mencion de
ceste avenue, vous seréz deshonnoree. Taisiéz vous ent, et je m’en
tairay aussy aussi pour vostre honneur." La damme qui plouroit moult tenrement
li dist: "Ha! traitre homme et mauvais, je m’en tairay, mais ce ne sera pas si
longuement que il vous besongneroit", et ouvry l’uis de la chambre du dongon et vint aval
et l’escuier aprés elle. Bien monstroit la damme qu’elle estoit courrouciee et
esploree. Si cuidoient ses gens, qui a nul mal ne pensoient, que l’escuier li eust dit
aucunes povres nouvelles de son mary ou de ses parens, pourquoy elle fust tourmentee
et desplaisant. La joene dame entra en sa chambre et s’en cloy et la fist ses regréz et ses
complaintes moult tenrement, et l’escuier monta sur son coursier et chevaucha ce jour
et vint a
Alençon entre X et XI heures, et fu ce
jour au lever du conte. La damme de Karouge demoura toute esgaree et porta
son anuy au plus bel comme elle pot, ne oncques ne s’en descouvry a creature.
Or retourna
messire Jehan de Karouge, quant il ot fait son
voyage. Sa femme le recueilli, mais ce fu moult matement, tant que le chevalier s’en esmerveilla et s’en
cloy en sa chambre, et li demanda quelle chose
elle avoit qu’elle faisoit si matte chiere. La damme li dist tout au long comme il estoit
avenu. Le chevalier fu courroucié grandement, et manda de ses amis et des amis a la damme, et fist la damme recorder a eulx tout le fait ainsi comme il avoit alé,
et sur ce il en demanda conseil. Il fu conseillié que il tournast ceste chose en apel en
Parlement a Paris, et point n’alast devers le conte d’Alençon, car le conte
amoit tant l’escuier que par lui il n’en aroit point de raison. Le
chevalier vint a
Paris, et fourma son apel en Parlement, et fu
Jaques Le Gris mandé, et quant il fu venu, il fist moult l’esmerveillié de
ces nouvelles, et les ignora, et nya de tous poins et du jour que la chose deust estre avenue. Il s’en
raporta au conte d’Alençon, et prouva bien par le dit conte que il estoit a six heures en sa chambre a
Alençon, et a X heures
il fu a son lever, et d’Alençon a Argenteil il y a X
lieues françoises ou plus, de laquelle chose on avoit grant merveille. Le chevalier
perseverant en son apel, sur l’informacion de sa femme, et l’escuier deffendant
sur les vrayes preuves que il monstroit, la plaidoirie dura plus d’un an et demi. Finablement, Parlement en ordonna et en fu champ jusques a
oultrance jugié et sentencié en chambre de Parlement
pb 148 r