le
bourc d’Espaigne et messire Raymond de Benac et Angelot Lane,
atout C lances, garderoient le
pas a Tournay, car il convenoit du mains
que leur bestail et leurs prisonniers passassent la la riviere de Lise. Et le sire de
Barbesen et
Ernauton Bisete, atout autres C lances,
chevaucherent a l’aventure pour savoir se nulz en verroient ne trouveroient.
Ainsi se departirent les ungs des autres, et s’en vinrent le sire de Benac et le
bourc d’Espaigne, et se misrent en embusche au pont entre Mauvoisin et Tournay,
et les autres prinrent les champs. Droitement sur le pas ou nous serons maintenant, qu’on dist
au Larre, ilz se trouverent, et si tost comme ilz se veirent, tous descendirent de leurs chevaux
et se laissierent aler paistre, et appuignierent leurs lances et s’en vinrent l’un sur l’autre, car
combatre les convenoit, en escriant leurs cris:
Saint George,
Lourde et Nostre Dame,
Bigorre. La vinrent ilz l’un sur l’autre et commencierent a bouter et a pousser fort et roide de
leurs lances et s’apassoient et s’apoioient en poussant de leurs poitrines et point ne s’espargnoient,
et la furent une espace en fierent de leurs lances l’un sur l’autre, que ce sambloit, si comme j’ay
oÿ recorder ceulx qui y furent, ung pont, ne nul a ce commancement n’estoit porté a terre. Quant
ilz eurent asséz bouté et poussé
de leurs lances, ilz les ruerent jus et estoient
ja tous eschaufféz, et prinrent leurs haches et se commencierent de haches a combatre et a donner
grans horions, et chascun avoit le sien. En cel estat et en ce parti d’armes furent il plus de trois heures, et se batirent si tres bien que merveilles, et quant il en y avoit aucuns qui
estoient oultré ou si meuz que ilz ne se pouoient soustenir et fouléz jusques a la grosse alaine, tout
bellement ilz se departoient et s’en aloient seoir sur ung fossé ou emmy le pré, et ostoient leurs
baschinéz et se rafreschissoient, et puis, quant ilz estoient bien refreschis, ilz remettoient leurs
bachinéz et s’en venoient combatre; ne je ne cuide pas que onques si bonne besongne fust qe
rencontre si dure ne bataille si bien combatue, puis la
bataille des XXX, qui
fu en Bretaigne, comme ceste de Marscheras en Bigorre
fu. Et la estoient main a main l’un et l’autre qui se combatoient; et la fut sur le point de estre
desconfi
Ernauton de Sainte Colombe, qui est asséz bel escuier, grant et fort et
bel homme d’armes, d’un escuier de ce paÿs qui s’apelle Guillaume de Salenges, et
l’avoit cil meu jusques a la grosse alaine, quant il en avint ce que je vous diray."
"
Ernauton de Sainte Colombe avoit
pb 19 r