qui point mieulx saroient faire
la besongne. Si furent lettres escriptes et bien dictees et distrectement en bon françois et aussi en
latin, lesqueles se devoient adrecier au roy d’Engleterre et au duc de Lancastre, et a ses freres le
conte de Cambruge et le
conte
de Bouquighen. Et quant ces lettres furent escriptes et seellees en latin et en françois, elles
furent leutes devant le roy et tout le conseil. Si pleurent grandement et lors
furent elles seellees et puis delivrees aux dessus diz le grant maistre de Saint Jaques et
Laurentien Fougasse, qui se chargierent entre eulx deux de les
porter en
Engleterre au plaisir de Dieu, mais qu’ilz peussent passer sauvement
les dangiers et perilz de mer, les fortunes et les rencontres des ennemis et des robeurs, car otretant
bien a robeurs en mer et plus que en terre. Si eurent une nef que on appelle lin,
qui va de tous vens et plus seurement que nul autre. Si prirent ung jour congié au roy
et a l’arcevesque de Braghes et a l’evesque de Conninbres, le grant
conseil de Portingal, et puis vinrent au port et entrerent ou vaissel nommé lin, et esquiperent en mer et singlerent a pouoir
vers le
roiaume d’Engleterre et furent trois jours en mer, absens de toutes terres, et
ne veoient que ciel et que eaue, et au quart jour ilz veirent Cornuaille.
Tant esploitierent les dessus diz, par l’esploit de Dieu et du vent et
par les marees, que leur maronnier savoit prendre a point, et tant costierent Cornuaille et les bendes d’
Engleterre que ilz arriverent sauvement et sans peril ou
havre de Hantonne, et la ancrerent. Si yssirent hors de leurs vaisseaux et s’en alerent
rafreschir en la ville. Bien furent enquis et demandéz du baillieu de Hantonne
et des gardes de la mer du havre, de quel paÿs ilz estoient, ne de qui ilz se rendoient,
ne quel part ilz aloient. Ilz respondirent a toutes ces demandes, et distrent que ilz estoient du
royaume de Portingal et la envoiéz depar le roy de Portingal et
son conseil. A ces paroles furent ilz les biens venus. Quant les dessus nomméz se
furent reposéz et rafreschis en Antonne ung jour et ilz eurent pourveü chevaux pour eulx et pour
leurs gens, et guides aussi qui les menroient devers
Londres, car ilz ne congnoissent
pb 85 r