comment que ce soit on ne le peut eschever, qui veult faire ce chemin, se on ne va parmi Nonnay. La estoit l’embusche du seigneur de La Vote, ou bien avoit IIC lances. Loïs Rambault ne se donna garde. Quant il fut emmy eulx, le sire de la Vote et ses gens qui estoient tous pourveüs de leur fait abaissierent les lances et s’en vinrent en escriant: La Vote, ferir a ces compaignons qui chevauchoient espars et sans arroy. La en y ot de premiere venue la greigneur partie de coups de lances portéz par terre, et fu Loïs Raimbault rué jus de son cheval d’un escuier d’Auvergne, qui s’appelloit Amblardon de Villejaque. On s’arresta sur luy. Il fu pris et tout le demorant mort ou pris, oncques riens n’en eschappa. Et treuverent en bouges la somme de trois mille frans que Loÿs Raimbault avoit receus a Anse de pattis des villaiges de la environ, dont les compaignons orent grant joye, car chascun en ot sa part. Quant Limosin vey Loïs Rambault ainsi attrappé, il s’amonstra en sa presence et dist par ramprouve: "Loÿs, Loÿs, cy fauldra compaignie. Souviengne vous du blasme et de la vergongne que vous me fesistes recepvoir a Brude pour vostre amie. Je ne cuidasse pas que pour une femme, se j’avoie ma grace a elle et elle a moy, que vous me deus