de Casteloingne qui s’appelloit messires Raymonst
de Baghes. Sur le fiance de ces cappitains
se tenoit li rois de Navare a Saint Jehan du
Piet dez Pors. Et les laissoit convenir. Mais
tous li plas païs environ Panpelune estoit
rifflés et perdus, ne nuls ne tenoit lez
camps fors li Espaignolz. Et cuidoient bien
que par lonc siege la cité de Panpelune se
deuwist rendre. Mais il n’en estoient en
nulle volenté. Car li viscontes de Castielbon
et li sirez de Lescut et Guillaumez de Panus et
Hortingos ensongnierent grandement et
tant que li Espaignol se commenchierent touts
a tasner. Car li yviers leur venoit. Et estoit
environ le Saint Andrieu. Si leur commencie
rent vitaillez a faillir. Et se n’eust esté le vis
conte de Rochebertin qui les rafresquit de
gens d’armes et de LX sommiers de vitaille,
il se fussent partis tres le Toussains. Li rois
de Navare envoia I sien chevalier qui s’ape
loit messires Pierrez li Bascles, devers les Engléz,
en priant que il se volsissent delivrer et
que trop longhement metoient au venir,
scelon ce que besoings touchoit et qu’il avoient
heu en couvenant. Li chevaliers esploita si
bien qu’il vint en le marce de Bayone et trou
va lez Engléz devant I chastel qui s’appielle
Pouillac. Si fist son message bien et a point
et tant que messires Thumas Trivés dist que,
ce fort conquis par traictié ou autrement,
il n’entenderoit jamais a autre cose, si seroit
allés en Navare et que sus ceste parole li
chevaliers pooit bien retourner, et retourna.
Ne demora depuis que II jours que li castiaus
se rendit par traictiet et se partirent chil qui
dedens estoient. Et fut rafresqui de nouvelles
gens. Che castiel pris, li païs demora assés
a paix. Encorez y avoit aulcuns petis fors
qui se tenoient, moustiers et eglises, et qui
heriioient le païs quant il pooient. Mais