il retourna en son païs, Jehans de Castille, aisnés
filz au roi Henri de Castille, qui chiésf se faisoit de
ceste guerre, et le connestable dou roiaume de
Castille avoec, qui s’appelloit dans Pierez de Marit,
tenoient le siege et avoient en devant tenu environ
la bonne cité de Panpelune et grant gents desous iaux.
En leur compaignie estoient li contes dant Alphons,
li contes de Medine, li contes de Marions, li contes de
Ribedé, Pierez Ferrans de Balesque et Pierrez
Gonsart de Modesque, et pluisieurs autres barons
et chevaliers de Castille et leurs gens. Et avoient cil
Espaignol, en venant devant Panpelune, pris et
ars la ville de Lorinch, et le cité de Viane dalés
Le Groing. Et n’i avoit seigneur nul en Navare
qui s’osast monstrer contre iaux. Mais se tenoit
cascuns en son fort et ens es montaignes. Et tout
che savoit bien li rois de Navare. Car tous les jours
il avoit messagiers allans et venans. Mais ils seulx
n’y pooit remediier sans le poissance et le confort
des Englés. Li sires de Noefville, qui se tenoit a Bour
diaux et qui la estoit envoiés depar le roi d’Engleterre
et son conseil, ensi que vous sçavés, pooit bien savoir
les nouvelles des grans alliances que li rois ses
sires et li rois de Navare avoient ensamble, avoit ja
prommis au roi de Navare que il les acompliroit a
son loial pooir. Si pensa sus et appella messire Thomas
Trivet, I moult vaillant chevalier, et lui dist : "Messire Thomas,
vous savés comment nous sommes envoiiés pardecha pour
regarder as frontieres dou païs et bouter noz ennemis
hors. Et pour conforter et conseillier le roi de Navare.
Et ja a il chil esté et nous a remonstré le grant
besoing qu’il lui touche. Vous fustes presens ou je li
heuch convenant qu’il seroit servis et aidiés. Il
convient qu’il le soit : autrement nous y ariens blame,
siques, chiers amis et compains, je vous ordonne
a estre chiésf de nos gens en ceste guerre. Et voel
que vous y allés atout VIC lances et mil archiers.
Et je demorrai en le marce de Bourdiaux, pour tant
que j’en suis senescaux et regars depar le roi d’Engle
terre. Et entenderay as besoingnes qui y demeurent.