pb 215 r
tant que il en orent grant d’acord, et avoient d’ordenance que ce joedy,
sus le point de VIII heurez, il se departiroient de leurs hostelz, la baniere
le conte de Flandrez en leur compaignie, et aroient un cry, en criant enssi:
Flandre au lion! Le signeur ou païs! Pais en le bonne ville de Gand, quité
et pardonné tous malefisses fais ! Onquez ne peurent ly dessus dit, ne ne
seurent, ceste cose demener si sagement ne si secreement que Pietrez dou
Bos ne le seuist. Sytos que il en fu enfourméz, il s’en vint devers
messire Jehan de Boursier, le souverain cappitaine pour lors depar le roy
d’Engletiere. Et ly dist: "Sire, enssi et ensi va. Rogiers Evrewin et Jaque
mez d’Ardembourc doient demain, sus le point de VIII heurez, venir
ou Marchiet des Devenrez, la baniere de Flandrez en leurs mains, et
doient la, en venant parmy la ville, criier: Flandrez au lion ! Le signeur ou
pais ! Paix a la bonne ville de Gand, et tenue en toutez ses francissez, et
quité et pardonné tous malefices fais! Enssi serons nous et le roy d’En
gletere, se nous n’alons au devant, bouté hors de nos juridicions." "Et quel
cose est bon", dist ly sirez de Boursier, "que nous en fachons?" "Il est bon", dist
Pietrez dou Bos, "que demain au matin nous nos asamblons en l’ostel de
le Walle, et faitez armer toutez vos gens, et nous en venons, fendant parmy
la ville, les banierez dou roy d’Engletere en nostre compaignie, et crions ensi:
Flandrez au lion! Le roy d’Engletere ou païs, et signeur de la ville de Gand,
et muirent tout li traiteur! Et quant nous serons venu ou Marchié dez
Venredis, chil qui sont de nostre acord, se traient avoecquez nous, et la
ochirons nous tous lez rebellez et les traiteurs envers le roy d’Engletere
a qui nous sommez." "Je le voel," dist ly sirez de Boursier, "et vous avéz bien visé,
enssi sera fait."
SHF 2-495 sync Or regardéz se Dieux fu bien pour les II preudommez dessus dis, sire
Rogier et sire Jaquemez. Car, de toute ceste ordonnance et de
tout ce que il devoient faire, il furent enfourmet. Quant il le
seurent, si ne furent pas esbahi, ne point ne le convenoit estre mais
ferme et fort, et tos consillié, le soir, il alerent et envoiierent devers
lez doiiens et leurs amis, en dissant: "Nous deviens aler ou Marchiet
des Devenrez a VIII heurez, mais il nous y faut estre a VII heurez." Et
tout ce fissent il pour rompre le fait de Pietre dou Bos. Tout s’y a
corderent, cil qui segnefiiet en furent et le fissent encorez assavoir
l’un a l’autre. Quant ce vint le joedy au matin, messires Jehan de Boursier pb 215 v