pb 209 v
chemin que nostre ennemy font, et tant cachier que nous lez trouvons, et eux combatre. Il
ne nous pueent par nul chemin dou monde fuir ne eslongier, que nous ne lez aions
a nostre aisse et volenté." En che pourpos estoient ly dus de Lancastre et si frere
et pluiseur haut baron d’Engletiere et la grigneur partie des communautéz de l’ost.
Et ja estoient leurs pourveancez toutez venuez, tant par mer comme par terre, et ly
rois meismement l’avoit, present sez onclez acordé et aresté, et tout estoient en celle
volenté quant une nuit li contez d’Asquesuffort, qui estoit pour che tamps tous
li coers et li consaulx dou roy, ne ly rois d’Engletiere n’amoit nul homme ne n’avoit
parfaitement fiance fors en luy, destourna et desconsilla tout, ne say mie sur quelle
entente, mais il infourma le roy, si com on sot depuis. Et li dist: "A! monsigneur, a quoy
pensés vous, qui voléz faire che chemin que vostre oncle vous conseillent a faire?
Sachiéz que, se vous le faitez ne alléz aucunement, jamais n’en retourneréz, ne ly
dus de Lancastre ne tire ne tent a autre cose que il soit rois, et que vous
soiiéz mors. Comment vous poet il ne osse consillier a aler sus l’ivier en paÿs
que point ne consilliéz et passer les montaignez de Northombrelande? Il y a
tels XXX passagez et destrois que, se nous estiens enclos dedens, jamais n’en
seriens hors fors par le dangier des Escos. Nullement ne vous boutéz en che
dangier ne peril, pour cose que on vous ait dit, et, se ly dus de Lancastre y voelt
aler, si voist, luy et sa carge. Car ja par mon conseil vous n’y enterés, vous en a
vés asséz fait pour une saisson. Onquez ly bons rois Edouwars, vostre tayon,
ne monsigneur le prinche, vostre pere, ne furent si avant en Escoce comme vous a
véz esté a celle fois. Sy vous doit bien souffire, gardéz vostre corps, vous estez
jonez et a venir. Et tels vous monstre biau samblant, qui moult petit vous aime."
Ly rois d’Engletiere entendy as parollez de ce conte dessus nommé si parfaitement, que
onquez depuis ne ly porent yssir hors de sa teste, sy comme je vous diray
enssieuant chi aprés.
SHF 2-483 sync Quant ce vint au matin, ly signeur d’Engletiere et leurs gens s’ordonnoient
au partir et tenir le chemin de Gallez, pour la aler, devant Karlion ou ailleurs,
combatre lez François et les Escos, enssi que le soir devant il avoient en conseil
proposé et aresté, et vint ly dus de Lancastre devers son nepveu le roy, qui
riens ne savoit de ce tourble, quant ly rois le vey, qui estoit en sa merancolie
et yrour par l’informacion dessus dite. Sy ly dist tout a certez: "Onclez, onclez
de Lancastre, vous ne venréz pas encores a vostre entente, pensséz vous que
pour vos parollez nous nos voellons perdre, ne nostrez gens ossy? Vous
estez trop outrageux de nous consillier follement. Et plus ne creray, ne vous
ne vostrez consaulx. Car en ce je voy plus de damage et de peril que de pourfit, pb 210 r